१५ साउन, काठमाडौं । मधेश केन्द्रित राजनीतिक दलहरुले जनसंख्यालाई मुख्य आधार बनाएर निर्वाचन क्षेत्र निर्धारण गर्न सुझाव दिएका छन ।
निर्वाचन क्षेत्र निर्धारण आयोगले आइतबार काठमाडौंमा आयोजना गरेको छलफलमा राष्ट्रिय जनता पार्टी, नेपाल र संघीय समाजवादी फोरम, नेपालले जनसंख्यालाई मुख्य आधार बनाएर निर्वाचन क्षेत्र निर्धारण गर्न आयोगलाई सुझाव दिएका हुन ।
२०६८ सालको जनगणनालाई आधार मानेर जनसंख्याको आधारमा निर्वाचन क्षेत्र निर्धारण गर्न आयोगलाई सुझाव दिइएको राष्ट्रिय जनता पार्टी, नेपालका नेता राजेन्द्र महतोले जानकारी दिए ।
संघीय समाजवादी फोरम, नेपालका अध्यक्ष उपेन्द्र यादवले जनसंख्यालाई मुख्य आधार बनाएर प्रदेश भित्रको क्षेत्र निर्धारण गर्न सुझाव दिइएको बताए ।
उनले संविधानले पनि जनसंख्यालाई मुख्य आधार बनाएर निर्वाचन क्षेत्र निर्धारण गर्ने व्यवस्था गरेको पनि स्मरण गराए ।
आगामी माघ ७ गते भित्र प्रतिनिधि सभा र प्रदेश सभा निर्वाचन सम्पन्न गर्नुपर्ने संवैधानिक बाध्यता छ ।
