२६ साउन, बाजुरा । नेपाली कांग्रेस जिल्ला कार्यसमिति बाजुराका सदस्य एवंम संगठन विभाग प्रमुख धनराज पण्डितसहित २८ जनाले बिहीबार पदबाट सामूहिक राजीनामा दिएका छन् ।
उनीहरुले संगठन विभाग प्रमुख पण्डितको नेतृत्वमा पार्टी सभापति कविराज पण्डित समक्ष सामूहिक राजीनामा दिएका हुन् ।
स्थानीय तह चुनावमा कांग्रेस बाजुराका माथिल्लो तहका नेताको मनोमानीमा टिकट वितरण गरिएको र पार्टी नीति विचार भन्दा पनि ब्यक्तिवादी चरित्र हावी रहेको भन्दै उनीहरुले पदबाट राजीनामा दिएको बताएका छन् ।
नेपाली काँग्रेस महाधिबेशन प्रतिनिधि राधिका सिंह, ५ जना जिल्ला कार्यसमिति सदस्य, नेविसंघका अध्यक्ष दिलवहादुर थापा,महिला संघका अध्यक्ष अमृता सिंह, तरुणदल सचिव हिरेन्द्र रोकाया, बडिमालिका नगरकार्यसमितिका कार्यवहाक सभापति धनलाल उपाध्याय लगायतकाले पदबाट राजीनामा दिएका हुन् ।
जीतको उन्मादमा पार्टीका नेताहरुले कांग्रेस भातृ संगठन,सुभेच्छुक संगठन र जिल्ला कार्यसमितिको बैठकसम्म नबोलाएर आफू अनुकुलका मान्छेलाई टिकट दिएको आरोप उनीहरुले लगाएका छन् ।
गाउँ तथा नगरपालिकाबाट सिफारिस भएर आएका व्यक्तिलाई टिकट नदिएको तर नेताका गोजीका मान्छेलाई टिकट दिएकाले पदवाट राजीनामा दिएको तरुणदलका जिल्ला सचिव हिरेन्द्र रोकायाले बताए । ‘हामी पार्टीको क्रियाशील सदस्य रहिरहन्छौं तर,पदमा बस्दैनौं,’ नगरसचिव गणेश थापाले भने,’नेताहरुले जबसम्म पार्टी पद्धती अनुसार चल्दैनन् तबसम्म हाम्रो दबाब जारी रहेनेछ ।’
रमित विकको सहयोगमा
प्रतिक्रिया 4