११ भदौ, काठमाडौं । व्यवसायीले आगामी कात्तिक (नोभेम्बर) पछि खाना पकाउने ग्यासको अभाव हुने चेतावनी दिएका छन् । आगामी नोभेम्बरपछि नेपाली नम्बर प्लेटका ग्यास ढुवानी गर्ने बुलेट सञ्चालन गर्ने पूर्वसहमति कार्यान्वयन नहुने परिस्थिति बनेपछि व्यवसायीले यस्तो चेतावनी दिएका हुन् ।
प्रधानमन्त्री शेरवहादुर देउवाको भारत भ्रमणमा पनि नेपाली नम्बर प्लेटको बुलेट सञ्चालन गर्ने सम्बन्धमा सहमति जुट्न नसकेपछि बुलेटमा लगानी गरेका नेपाली व्यवसायी निरास भएका छन् ।
‘सरकारकै स्वीकृतिमा बुलेट निर्माणमा गरेको लगानी डुबेपछि हामीले भारतीय ढुवानीकर्ताबाट ग्यास आयात गर्ने भन्ने कुरा रहँदैन,’ नेपाल एलपी ग्यास उद्योग संघका अध्यक्ष शिव घिमिरेले अनलाइनखबरसँग भने । आगामी नोभेम्बरपछि भारतीय ग्यास खरिद नगर्ने घिमिरेले बताए ।
संघका अनुसार ग्यास बुलेट निर्माणका लागि व्यवसायीले करीव ५ अर्ब रुपैयाँ लगानी गरिसकेका छन् । नेपाल आयल निगमले गत ०७३ असार २७ गते ७ सय ७५ थान नेपाली नम्बर प्लेटका बुलेट निर्माणका लागि व्यवसायीलाई स्वीकृति दिएको थियो । बुलेट आयातका लागि सरकारले ६६ प्रतिशत भन्सार छुटसमेत दिने निर्णय गरिसकेको छ ।
संघका अनुसार हालसम्म करीब ४ सय थान ग्यास बुलेट निर्माण भइसकेका छन् । ती बुलेटमा करीब ३ अर्ब रुपैयाँको लगानी भइसकेको छ । विष्फोटनमुक्त प्रमाणपत्र (एक्स्प्लोसिभ सर्टिफिकेट) का नाममा भारतले नेपाली नम्बरप्लेटका निर्माण भइसकेका बुलेट सञ्चालनमा अवरोध गरिरहेको छ । भारतको ‘एक्स्प्लोसिभ’ डिपार्टमेन्टले उक्त प्रमाणपत्र जारी गरेपछिमात्र भारतीय आयल निगमले ग्यास लोड दिन्छ ।
प्रधानमन्त्री देउवाको हालैको उच्चस्तरीय भारत भ्रमणमा पनि बुलेट सञ्चालन गर्न सहमति कायम गर्ने सम्बन्धी मुद्दालाई प्रमुखताका साथ समेटिएको थियो । तर, उक्त विषयमा भारतले चासो नदेखाएपछि व्यवसायी यसबाट रुष्ट भएका छन् ।
भारतले ग्यास ढुवानीमा रहेको आफ्नो एकाधिकार कायमै राख्न खोजेको व्यवसायीको बुझाई छ ।
यसअघि परराष्ट्रमन्त्री कृष्णबहादुर महराको भारत भ्रमणमा पनि विदेशमन्त्री सुष्मा स्वराजले नेपाली नम्बर प्लेटका बुलेट सञ्चालन गर्न नदिने मनसाय व्यक्त गरेकी थिइन् ।
हाल भारतीय नम्बरप्लेटका झण्डै ६ सय बुलेटले नेपालमा ग्यास ढुवानी गर्छन् । ती बुलेटमार्फत हाल मासिक करीव ३० हजार मेटि्रक टन ग्यास आयात हुन्छ ।
संघले सरकारकै स्वीकृतिमा बुलेटमा लगानी गरेको भन्दै बुलेट सञ्चालन गर्न नपाए क्षतिपूर्ति दिनुपर्ने माग गरेको छ । ‘यदि व्यवसायीले गरेको लगानी अनुसार बुलेट सञ्चालनमा आउन नसक्ने हो भने सरकारले उचित क्षतिपूर्ति दिलाउनुपर्छ,’ संघका अध्यक्ष घिमिरेले भने ।
नेपाली बुलेट सञ्चालनमा नआए भारतीय बुलेटबाटै ढुवानीः निगम
यता नेपाल आयल निगमले भने आगामी नोभेम्बरपछि नेपाली बुलेटले ग्यास ढुवानी गर्ने अवस्था नआए भारतीय बुलेटबाटै ग्यास ढुवानी हुने बताएको छ । ‘भारतीय ढुवानीकर्ताले नोभेम्बरपछि ग्यास ढुवानी साविककै बमोजिम गरिदिने जानकारी गराएका छन्,’ निगमका प्रवक्ता वीरेन्द्र गोइतले भने, ‘ढुवानीकै कारण ग्यास अभाव हुने अवस्था आउँदैन ।’