भोलि सप्तरीका सबै स्थानीय तह बन्द गर्ने निर्णय

११ कात्तिक, सप्तरी । राजविराजबाट काठमाडौंतर्फ जाँदै गरेको बद त्रिशुली खोलामा भएको दुर्घटनामा परी सप्तरीका झण्डै डेढ दर्जन व्यक्तिको ज्यान गएपछि जिल्लाका सबै स्थानीय तहले शोक मनाउने भएको छ ।

सबै स्थानीय तहमा आइतबार एक दिनको विदा दिँदै शोक मनाउने निर्णय भएको राजविराज नगरपालिकाका प्रमुख शम्भु यादवले जानकारी दिएका छन् । जिल्लामा १८ वटा स्थानीय तह छन् ।

जिल्लाको सबै स्थानीय तहका प्रमुखहरुसँग यसबारेमा छलफल भइसकेको राजविराजका प्रमुख यादवले बताए ।

यसैबीच संघीय समाजवादी फोरम नेपाल र एमाले सप्तरीले दुर्घटनाप्रति दुःख व्यक्त गरेका छन् ।

फोरम नेपालका जिल्ला अध्यक्ष दिनेशकुमार यादवले बिज्ञप्ती जारी गर्दै घाइतेहरुको शिघ्र स्वाथ्य लाभको कामना गरेका छन् । साथै विज्ञप्तिमा दुर्घटनामा परी मृत्यु भएकाको परिवारलाई क्षतिपूर्ति र घाइतेहरुको निःशुल्क उपचारको ब्यबस्था मिलाउन माग गरिएको छ ।

यस्तै एमाले सप्तरीले पनि मृतकहरुप्रति श्रद्वाञ्जली व्यक्त गर्दै मृत्यु हुनेको परिवारलाई अबिलम्ब क्षतिपूर्ति उपलब्ध गराउन माग गरेको छ ।