१५ कात्तिक, गान्तोक । भारतको हिमाली राज्य सिक्किममा पहिलो विमानस्थल निर्माण सम्पन्न भएको छ ।
सन् २०१२ मा निर्माण सम्पन्न गर्ने लक्ष्य रहेकामा पाँच वर्ष ढिलो गरी उक्त विमानस्थल तयार भएको हो ।
पाकयोङस्थित विमानस्थलको उद्घाटन ३० नोभेम्बरमा हुने सरकारी अधिकारीहरुले जनाएका छन् । भारतीय प्रधानमन्त्री नरेन्द्र मोदीले उक्त विमानस्थल उद्घाटन गर्ने तयारी छ ।
सिक्किमका मुख्यमन्त्री पवन चाम्लिङ ७ नोभेम्बरमा नयाँदिल्ली जाने तयारीमा छन् । राज्यलाई अर्गानिक क्षेत्र बनाउन सफलता पाएका उनी १९ औं अर्गानिक सम्मेलनमा भाग लिन नयाँदिल्ली जान लागेका हुन् ।
पाकयोङ विमानस्थललाई विकासमा उनको अर्को सफलताका रुपमा हेरिएको छ । ९ सय ९० एकर्डमा फैलिएको विमानस्थल राजधानी गान्तोकबाट ३५ किमि टाढा पर्छ । त्यसको लागत तीन करोड भारतीय रुपैयाँ मात्र हो । र, समुद्री सतहबाट ४७ सय फिटको उचाइमा अवस्थित छ ।
उक्त विमानस्थललाई सिक्किमको पर्यटन प्रबर्द्धनमा कोशेढुंगाका रुपमा पनि हेरिएको छ ।
अहिले भारतभर जहाँ जानु परे पनि एक सय २४ किमि टाढास्थित बागडोगरा विमानस्थल पुग्नु पर्छ ।
