१५ कात्तिक, अछाम । दोस्रो चरण अन्तर्गत मंसिर २१ गते हुने प्रतिनिधिसभा र प्रदेशसभाका लागि अछाममा उम्मेदवारको टुंगो लागेको छ ।
मुख्य प्रतिस्पर्धीहरु नेपाली कांग्रेस र वामगठबन्धनले अछामका २ वटा प्रतिनिधिसभा र प्रदेशसभा सदस्यका उम्मेदवारहरु टुंगो लगाएका हुन् ।
क्षेत्र नं. १ मा गठबन्धनका तर्फबाट एमालेका भीम रावल र नेपाली कांग्रेसका भरतकुमार स्वारबीच प्रतिस्पर्धा हुने भएको छ ।
रावल कांग्रेसका स्वारको लागि ‘हेवी वेट’ उम्मेदवार हुन् । एमालेका केन्द्रीय उपाध्यक्ष रावलसँग प्रतिस्पर्धा गर्न लागेका स्वार नेपाली कांग्रेस अछामका सभापति तथा पूर्व जिल्ला विकास समितिका सभापति हुन् ।
यस्तै अछाम क्षेत्र नं. २ मा नेपाली कांग्रेसबाट पुष्पबहादुर शाह र वाम गठबन्धनबाट एमालेकै यज्ञबहादुर बोगटीले टिकट पाएका छन् ।
शाह नेपाली कांग्रेस अछामका पूर्व सभापति हुन् भने बोगटी एमालेका वर्तमान जिल्ला सचिव हुन् ।
प्रदेशतर्फ क्षेत्र नम्बर १ को (क) मा नेपाली कांग्रेसबाट मेघराज खड्का र एमालेबाट गोविन्दबहादुर कुँवरबीच प्रतिस्पर्धा हुने भएको छ ।
खड्का दोश्रो संविधानसभा निर्वाचनमा भीम रावलसँग निकटम प्रतिस्पर्धी भएर चुनाव हारेका थिए ।
सोही क्षेत्रको (ख) मा गठबन्धनबाट माओवादी केन्द्रबाट झपट बोहरा र कांग्रेसबाट टेकबहादुर साउँद आमुनेसामुने हुँदैछन् । बोहरा बैंकर हुन् भने साउँद कांग्रेस जिल्ला पूर्व सचिव हुन् ।
यस्तै क्षेत्र नम्बर २ को (क) मा वाम गठबन्धनबाट माओवादी केन्द्रका अक्कलबहादुर रावल र नेपाली कांग्रेसबाट सुरतबहादुर विष्टले टिकट पाएका छन् । रावल केन्द्रीय आयोजक समिति सदस्य हुन भने विष्ट रिटायर्ड शिक्षक हुन् ।
सोही क्षेत्रको (ख) प्रदेशमा नेपाली कांग्रेसबाट बलबहादुर कुँवर र एमालेबाट बलबहादुर सोडारीले टिकट पाएका छन् । कुँवर दोश्रो संविधानसभा निर्वाचनमा एमालेका भरत साउँदसँग निकटतम प्रतिद्धन्दी भएर पराजित भएका थिए भने सोडारी एमाले जिल्ला सचिवालय सदस्य हुन् ।
