दीपकले भने–‘महिलामाथि वियर खन्याएर नाचेको दृश्य महिला हिंसामा पर्छ या पर्दैन ?’

चलचित्र ‘फिर्के’को ट्रेलर सार्वजनिक कार्यक्रममा पुगेका कलाकार दीपकराज गिरीले घुमाउरो शैलीमा नायिका ऋचा शर्मासँग भैरहेको विवादको बिषयमा मुख खोलेका छन् । ऋचाले दीपकले निर्माण गरेको चलचित्र ‘छक्का पन्जा’मा महिला हिंसा भएको भन्दै एक कार्यक्रममा टिप्पणी गरेपछि बहस सुरु भएको थियो ।

त्यसपछि निरन्तर फेसबुकमा जवाफ दिदै आएका दीपकले पत्रकारहरुसँग पहिलो पटक बोल्दै भने–‘हामी चलचित्रको कर्ममा छौ, धर्ममा छौ । सबै चलचित्र सर्वप्रिय हुँदैनन् । राम्रो वा नराम्रो भन्न पाइन्छ । सबै चलचित्र राम्रो व्यापार गर्दैमा राम्रो नै हुन्छन् भन्नेपनि छैन । हाम्रा चलचित्रमा प्रयोग भएका साना–साना शब्दलाई सेन्सरमा अड्काइने गरिन्छ ।’

उनले, चलचित्रमा सुरुमा अन्याय देखाइने र त्यसपछि न्याय देखाइने समेत बताए । दीपकले भने–‘मलाई थाहा छैन, महिलामाथि पुरुषले वियर खन्याएर नृत्य गरेको दृश्य महिला हिंसामा पर्छ या पर्दैन ।’ उनले चलचित्र ‘छक्का पन्जा’मा महिला हिंसा नभएको जिकिर गरे । चलचित्र क्षेत्र राम्रो हुँदै गएको समयमा चलचित्र क्षेत्र भित्रकै मानिसहरुले साथ दिनुपर्ने उनको भनाई थियो ।