४ पुस, काठमाडौं । नेकपा एमालेका अध्यक्ष केपी शर्मा ओली पार्टीका केही शीर्ष नेतासहित मंगलवार बिहान रसुवाको लाङटाङ पुगेका छन् । चुनावबाट सबैभन्दा ठूलो दलको अध्यक्ष बनेका ओली राष्ट्रियसभा गठनको तनाव छल्दै हिमालतिर लागेका हुन् ।
ओलीसँगै एमाले महासचिव ईश्वर पोखरेल, उपमहासचिव विष्णु पौडेल, स्थायी कमिटी सदस्य सुवास नेम्वाङ र शंकर पोखरेल पनि लाङटाङतर्फ लागेका छन् ।
ओलीसँगै गएका नेताहरु पार्टीभित्र ओलीका रणनीतिकारका रुपमा चिनिन्छन् ।
मनाङ एयरको हेलिकोप्टरबाट नेताहरु सुन्दर हिमाली क्षेत्र लाङटाङ भ्याली पुगेका हुन् ।
ओलीका प्रेस संयोजक चेतन अधिकारीले भूकम्पपीडित स्थलको निरीक्षणका लागि नेताहरू लाङटाङ पुगेको बताए ।
यद्यपि यतिबेला भूकम्प पीडितको अनुगमन गर्ने सन्दर्भ नपरेकाले यो यात्राको राजनीतिक उदेश्य हुनसक्ने अनुमान गरिएको छ ।
त्यसो त प्रधानमन्त्री भएका बेला पनि ओली भूकम्पले तहस नहस भएको लाङटाङ पुगेका थिए ।