२९ माघ, जनकपुरधाम । प्रदेश २ मा प्रदेशसभाका मर्यादापालकको नयाँ ड्रेसकोर्ड तय भएको छ ।
प्रदेशसभाको पहिलो बैठक बस्नुअघि नै सर्वदलीय बैठकबाट दौरा सुरुवाल लगाउन नपाउने निर्णय गरेपछि मर्यादापालकहरु आफू खुसी ड्रेस लगाएर पुगेका थिए । पुरुष मर्यादापालक सर्टपाइन्ट-स्वेटर तथा ज्याकेट र महिला मर्यादापालक कुर्तासुरुवालमा पुगेका थिए । उनीहरुलाई चिनाउन ब्याच दिइएको थियो ।
संसदीय अभ्यासमा मर्यादापालकको एउटै ड्रेस हुनु राम्रो हुने भन्दै प्रदेश २ मा भएको अभ्यासको आलोचना पनि भयो ।
सोमबार कार्यव्यवस्था परामर्श समितिको बैठकले मर्यादापालकको ड्रेस कोर्ड निर्धारण गरेको छ ।
प्रदेशसभा सदस्य मनिष सुमनले भने, ‘गर्मीमा दौरा सुरुवाल लगाउन सकिन्न । पुरुष मर्यादापालकले कफी कलरको सफारी सुट र महिलाले सारी लगाउने निर्णय भएको छ ।’
