२२ जेठ, हेटौंडा । ४६ औं विश्व वातावरण दिवसको अवसरमा प्रदेश ३ का उद्योग, वन, पर्यटन तथा वातावरण मन्त्री अरुण नेपाल मंगलबार पूर्वपश्चिम राजमार्ग सफाइमा निस्किए ।
उनीसँगै प्रदेशसभा ३ का सांसद, सरकारी अधिकारीहरुले पनि राजमार्ग वरपर फालिएका प्लाष्टिक टिपेका छन् ।
मन्त्रालयले प्रदेश राजधानी हेटौंडाको चुरियामाईदेखि सिमाना चितवनको नारायणी पुलसम्म राजमार्गको दुबै क्षेत्रमा रहेको फोहर संकलन अभियान सञ्चालन गरेको छ ।
राजमार्ग क्षेत्रका समुदायिक वन समूहलाई प्रयोग गर्दै थालिएको अभियान निरन्तर सञ्चालन गर्नुपर्ने मन्त्री नेपालले बताए ।
हेटौंडाबाट थालिएको अभियान मकवानपुरको मनहरी गाउँपालिकाको लोथरसम्म चलेको थियो ।
मन्त्री नेपालले प्लाष्टिकले वातावरण नष्ट गर्ने भन्दै यसको नियन्त्रण अहिलेको महत्वपूर्ण काम भएको बताएका छन् । वातावरण मानिसको खुला घर भएकाले यसलाई नष्ट गर्ने प्लाष्टिकजन्य वस्तु नियन्त्रण अत्यन्त जरुरी रहेको बताए ।
उनले भने ‘वर्षौंसम्म नकुहिने पदार्थलाई रोक्नु अहिलेको आवश्यकता भएकाले मन्त्रालयले अभियान चलाएको हो ।’
मन्त्री नेपालले आउँदो ३ वर्षमा प्रदेशमा प्लाष्टिकजन्य पदार्थको उपयोगलाई हटाउन नीति पास गरिसकेको जानकारी दिए । अहिले हामीले प्रयोग गर्दै गरेको प्लाष्टिक जन्य पदार्थ सबै खतरनाक भएको भन्दै सबै भन्दा बढी डरलाग्दो प्लाष्टिकको गिलास भएको बताए ।
उनले भने ‘सजिलोको लागि प्रयोग गरिदै आएको प्लाष्टिकको गिलास क्यान्सरको महत्वपूर्ण स्रोत हो, त्यसैले तातो चिया पिउन र अन्य कामका लागि प्लाष्टिकको गिलास प्रयोग अहिलेबाटै बन्द गरौं ।’
पृथ्वी प्लाष्टिकमय भए, मानवका लागि उपयुक्त नहुने बताउदै मन्त्री नेपालले भने ‘प्रदुषणको मुख्य जड प्लाष्टिक हो ।’
प्रतिक्रिया 4