नायिका वर्षा शिवकोटी हिट फिल्मको खोजीमा छिन् । त्यसैले आजबाट रिलिज हुने फिल्म ‘जय शम्भू’ उनको लागि महत्वपूर्ण छ ।
वर्षाले अत्यधिक आशा गरेको ‘कारखाना’ हेर्न दर्शक हलसम्म आएनन् । हालै मात्र प्रदर्शित ‘भैरे’ ले पनि खासै राहत दिन सकेन । यद्यपि, दुवै चलचित्र हेर्ने दर्शकले भने मन पराएको उनले पाएकी छन् ।
‘कारखाना यूट्यूवमा आएपछि मैले धेरै राम्रा प्रतिक्रियाहरु पाइरहेकी छु,’ उनले भनिन्, ‘भैरे हेरेकाहरुले पनि प्रशंसा गर्नुभएको छ ।’
जय शम्भूमा आफूले केही फरक खालको भूमिका गरेको र यसलाई पनि दर्शकले मन पराउने उनको विश्वास छ । यो फिल्ममा उनी अनुप विक्रम शाहीको अपोजिटमा देखिदैछिन् । फिल्ममा प्रशान्त ताम्राकारको पनि अहम् भूमिका छ ।
चलचित्रको पब्लिसिटीका लागि विभिन्न स्थानमा पुगेकी वर्षाले दर्शकमाझ फिल्मप्रति निकै कौतुहलता रहेको पाएकी छन् ।
उनले भनिन्, ‘दुई जना चर्चित भिलेन एउटै फिल्ममा भएकाले पनि दर्शकको चासो बढेको पाएँ ।’
यो फिल्म एक्सनप्रधान भए पनि लभस्टोरी पनि रहेको उनले जानकारी दिइन् ।