९ भदौ, काठमाडौं । नेपाली कांग्रेसको महासमिति बैठक आगामी मंसिर पहिलो साता हुने भएको छ ।
शनिबार बसेको केन्द्रीय कार्यसमितिको बैठकले महासमिति बैठकको मिति तय गरेको हो । मंसिर ५ देखि ९ गतेसम्म महासमिति बैठक हुने नेता प्रदिप पौडेलले बताए ।
यसअघि भदौ मसान्तमै गर्ने निर्णय भएको थियो । विधान संशोधन मस्यौदा समिति बनाउन निकै समय लागेपछि महासमिति बैठक छठ पर्व पछाडि हुने भएको हो ।
केन्द्रीय कार्यसमितिको बैठक अघि शीर्ष नेताहरु बसेर महासमिति सार्ने सहमति गरेका थिए ।
महासमिति टार्न खोजेको आरोप लागेपछि देउवाले पदाधिकारीहरुलाई भदौभित्रै बैठक गर्ने तयारी गर्न निर्देशन दिएका थिए । तर, विधान मस्यौदा समितिका सदस्यहरुले समय नपुग्ने बताएको र शीर्ष नेताहरु पनि सहमत भएका हुन् ।
केन्द्रीय कार्यसमितिको बैठकमा भने उपसभापति विमलेन्द्र निधिले प्रस्ताव राखेका थिए । केही नेताले धेरे ढिला सारिएको गुनासो गरेपछि केन्द्रीय सदस्य अर्जुननरसिंह केसीले आफूहरुको सहमतिमै प्रस्ताव आएको बताएका थिए ।
बैठकले महासमिति बैठकको तयारीका लागि विभिन्न समितिहरु बनाएको छ । पार्टी सभापति शेरबहादुर देउवा नेतृत्वको मूल तयारी समिति गठन भएको छ भने उपसभापति विमलेन्ऽ निधिले राजनीतिक, महामन्त्री शशांक कोइरालाको नेतृत्वमा सांगठनिक र कोषाध्यक्ष सीतादेवी यादवले आर्थिक प्रतिवेदन बनाउने छन् ।
पार्टीको अर्थ नीतिसम्बन्धि धारणा तय गर्न डा. प्रकाशरण महत नेतृत्वको समिति गठन गरेको छ । बैठकले विधान संशोधनका लागि महामन्त्री पूर्णबहादुर खड्का नेतृत्वको गठित विधान संशोधन मस्यौदा समितिलाई अनुमोदन गरेको छ ।
नेताहरुका अनुसार जिल्ला दुई सभापतिलाई स्थायी आमन्त्रित सदस्य बनाउने सहमति भएको छ । समिति गठन हुँदा उनीहरु आमन्त्रित मात्र थिए । तर, रामचन्द्र पौडेलले जिल्ला सभापतिहरुलाई राख्नुपर्ने अडान लिएका थिए ।
अनुशासन समिति बनेन
कांग्रेसको केन्द्रीय कार्यसमितिको बैठकले अनुशासन समिति भने बनाउन सकेन । पार्टी सभापति शेरबहादुर देउवाले भीष्मराज आङदाम्बेको नेतृत्वमा समिति बनाउने तयारी गरेका थिए । तर, पौडेल र कृष्ण सिटौला समूहले विरोध गरे ।
शनिबार केन्द्रीय कार्यसमितिको बैठक अघि सिटौलाले देउवालाई भेटेर सहमतिकै आधारमा अनुशासन समिति र कार्यसम्पादन समिति बनाउन मनाएका हुन् ।
प्रतिक्रिया 4