४ असोज, काठमाडौं । आईसीसी टी-२० विश्वकप क्रिकेटअन्तर्गत एसिया छनोटको लागि नेपाली क्रिकेट टिमले आजदेखि अभ्यास थालेको छ ।
अक्टोबर ३ तारिखदेखि मलेसियामा सुरु हुने एसिया छनोटका लागि नेपाली क्रिकेट टिमले बिहीबारदेखि अभ्यास थालेको हो ।
अभ्यासको पहिलो दिन बिहीबार नेपाली खेलाडीहरुले फिट्नेश र फिल्ड वर्क गरेको नेपाली क्रिकेट टिमका मुख्य प्रशिक्षक जगत टमाटाले बताए । उनले अगाडि भने, ‘बैदेशिक भ्रमणको कुनै योजना बनाएका छैनौं । प्रतियोगिता नजिकिँदै आएको कारण हामी नेपालमै तयारी गर्छौं ।’
‘क्रिकेट हो, हाम्रो लक्ष्य भनेको कप उठाउने नै हो । फोकस पनि हामीले त्यही अनुसारको गरेको छौं ।’
हालै मात्र पारस खड्काको कप्तानीमा १८ सदस्यीय प्रारम्भिक नेपाली क्रिकेट टिमको घोषणा भएको थियो ।
एसिया छनोट ‘बी’मा नेपालसँगै आयोजक मलेसिया, सिंगापुर, थाइल्यान्ड, चीन, भुटान र म्यानमार छन् । समूहको शीर्ष तीनमा पर्ने टिम एसियाली छनोटको फाइनल राउण्डमा प्रवेश गर्नेछ ।
