१० असोज, जुम्ला । अविरल वर्षापछि आएको पहिरोका कारण उर्थु– लासी सडकखण्ड तीन महिनादेखि अवरुद्ध बनेको छ ।
पातारासी गाउँपालिकाको उर्थुदेखि डिल्लीचौरको लासी बजारसम्मका विभिन्न स्थानमा खसेको पहिरोले सडक भत्काएपछि सवारी आवागमन ठप्प भएको छ ।
सडक अवरुद्ध हुँदा पैदल हिँड्नसमेत असुविधा भएको गुनासो सर्वसाधारणले गरेका छन् ।
सडकमा खसेको पहिरोले जनजीवन प्रभावित भए पनि मर्मतमा सरोकारवालाले चासो नदेखाएको पातारासी गाउँपालिका–५ का विर्षबहादुर बुढाले गुनासो गरे ।
सो क्षेत्रका व्यापारीले भरियामार्फत सामान ढुवानी गर्दै आएका छन् ।
‘पहिरोले आवागमन प्रभावित भएपछि दैनिक उपभोग्य वस्तुको अभाव भएको छ, सामान महँगो छ’, पातारासी–५ का मुनबहादुर बुढाले भने ।
पातारासी गाउँपालिकाका अध्यक्ष लछिमन रोकाया भने वर्षाले लगातर पहिरो खसेकाले सडक मर्मत गर्न ढिलाइ भएको बताउँछन् ।
