८ कात्तिक, महोत्तरी । अबैध रूपमा भारत निकासी गर्न लागेको २४ कार्टुन मदिरा महोत्तरी प्रहरीले बरामद गरेको छ ।
भारतीय नम्बर प्लेटको गाडीका चालक प्रहरीको गस्ती टोलीलार्इ देखेपछि गाडी नै छोडेर चालक भागेका थिए । उक्त गाडी चेकजाँच गर्दा २४ कार्टुनमा २५० एम.एलको ८०० पिस सोफी (रक्सी) फेला परेको जिल्ला प्रहरी कार्यालय महोत्तरीले जनाएको छ ।
जलेश्वर नगरपालिका वडा नं. ३ स्थित पर्सापतैलीबाट भारत भिठामोडतर्फ जाँदै गरेको डीएल ३ सीडी २२८७ नम्बरको भारतीय नम्बर प्लेट भएको गाडीमा अबैधरुपमा मदिरा भारततर्फ निकासी गर्न खोज्दा प्रहरीले पक्राउ गरेको जनाएको छ ।
पक्राउ परेको गाडी र २४ कार्टुन मदिरा(सोफी रक्सी) आवश्यक कारवाहीको लागि राजश्व कार्यालय जनकपुर पठाइएको जिल्ला प्रहरी कार्यालय महोत्तरीका डीएसपी खग्रेन्द्र खड्काले जानकारी दिए ।
पछिल्लो केही समय सीमानाकामा भारतको बिहार राज्यबाट मदिरा सेवनकर्ताहरु आउने गरेका छन् । भारतको बिहारमा मदिरा प्रतिबन्धित भएपछि पछिल्लो समय नेपालबाट मदिरा तस्करी हुन थालेको हो ।
