सन् २०१८ मा युट्युबमा चर्चित घटनालाई समेटेर तयार पारिएको एउटा भिडियो युट्युब इतिहासकै सबैभन्दा धेरै डिसलाइक पाउने दोस्रो भिडियो बनेको छ ।
सन् २०१८ मा युट्युबमा चर्चा कमाएका भिडियो, संगीत तथा ट्रेण्डका बारेमा रिक्याप प्रस्तुत गरिएको ‘युट्युब रिविन्ड २०१८’ नामक भिडियो इतिहासकै सबैभन्दा मन नपराइएको भिडियोको सूचीमा दोस्रो स्थानमा परेको छ ।
युट्युब स्पटलाइट च्यानलमा अपलोड गरिएको यो भिडियो हालसम्म ७३ लाख जनाले डिसलाइक गरेका छन् । जबकि, लाइक गर्नेको संख्या जम्मा २० लाख छ । यो भिडियो हालसम्म झण्डै १० करोडले हेरिसकेका छन् ।
युट्युबमा हालसम्म सबैभन्दा धेरै डिसलाइक पाउने भिडियो जस्टिन बिबरको बेबी गीतको भिडियो हो । जसलाई हालसम्म ९७ लाखले डिसलाइक गरेका छन् ।
जबकि बिबरको उक्त भिडियोमा यतिधेरै डिसलाइक आउन आठ वर्षको लागेको छ । तर युट्युबको पछिल्लो भिडियोले भने चार दिनमै यतिधेरै डिसलाइक कमाएको छ । यो ट्रेण्ड हेर्दा यो भिडियो छिटै नै इतिहासकै मन नपराइएको भिडियो बन्ने पक्का छ ।
आखिर यो भिडियो किन यति धेरैले मन पराएनन् त ?
सन् २०१८ लाई फर्केर हेर्दा विषयक यो भिडियोले आलोचनाको शिकार बन्नुको मुख्य कारण यस वर्षका कतिपय युट्युब स्टारहरुलाई नसमेटिनु हो । लोगान पाउनल, शेन डसन तथा पिउडाइपाइ लाई यसमा समेटिएको छैन ।
टप युट्युब च्यानल हुनका लागि बलिउड च्यानल टी सिरिजसँग तीव्र प्रतिस्पर्धामा रहेको पिउडाइपाइलाई समावेश नगरिएको विषयमा धेरैले टिप्पणी गरेका छन् । यो च्यानलका ७ करोड ५० लाख सब्सक्राइबर छन् ।
त्यस्तै लोगान पाउल र केएसआइबीचको बक्सिङलाई पनि समावेश नगरिएको विषयमा आलोचना गरिएको छ । स्मरणरहोस् उक्त स्पर्धालाई ८ लाख युट्युब प्रयोगकर्ताले स्ट्रिमिङ्ग गरेका थिए ।