२६ चैत, बिराटनगर । व्यक्तिगत लाभका लागि सेवाग्राहीसँग तेल माग्ने प्रहरीसहित चारजना बिभागीय कारबाहीमा परेका छन् ।
सवारी साधनका लागि सेवाग्राहीसँग तेल माग्ने प्रहरी चौकी गछिया मोरङका प्रहरी हबल्दार वीरेन्द्र यादव विभागीय कारवाहीमा परेका हुन् । उनले चैत १६ गते सेवाग्राहीसँग तेल मागेका थिए ।
मोरङ प्रहरीले प्रहरी चौकी बिराटनगर बखरीका प्रहरी सहायक निरीक्षक सन्तोषकुमार यादव, प्रहरी चौकी आपगाछीमा कार्यरत प्रहरी जवान धर्मराज भण्डारी र केशव दर्जीलाई पनि विभागीय कारबाहीका लागि सिफारिस गरेको छ ।
चैत २२ गते अनुगमनका क्रममा प्रहरी चौकी बखरीका इञ्चार्जसमेत रहेका सहायक निरीक्षक यादवले गैरजिम्मेवार र लापरबाही पूर्ण तरिकाले प्रहरी परिचालन गरेको भेटिएको थियो ।
अनुगमनकै क्रममा चैत २४ गते प्रहरी चौकी आपँगाछीमा कार्यरत जवान भण्डारी र दर्जीले गैरजिम्मेवार तथा लापरबाहीपूर्ण तरिकाले काम गरेको पाइएपछि प्रहरी नियमावली अनुसार कारवाही प्रकृया अघि बढाइएको जिल्ला प्रहरी कार्यालय मोरङले जानकारी दिएको छ ।