युएई । पर्यटन वर्ष २०२० को प्रचारका लागि युएईमा नेपाली साँझ सम्पन्न भएको छ । नेपाल पर्यटन वोर्ड, नेपाल एयरलाइन्स र नेपाली दूतावास आबुधाबीको संयुक्त आयोजनामा दुवईमा कार्यक्रम भएको हो ।
कार्यक्रममा उपस्थित विभिन्न देशका नियोग प्रतिनिधि तथा पर्यटन व्यवसायीहरु माझ नेपालको पर्यटकीय गन्तव्य तथा विभिन्न संस्कृति झल्कने वृतचित्र प्रस्तुत गरिएको थियो ।
पर्यटन विकास वोर्डका प्रवन्धक सुमन घिमिरेले अरवीयन पर्यटकीय मेलामा नेपालले पछिल्ला वर्षहरुमा नियमित सहभागीता जनाउँदै आएको र यसले नेपालको पर्यटक प्रर्वधनमा फाइदा पुर्याएको जनाए।
नेपालको धर्म संस्कृति प्रति पर्यटकको आकर्षण रहेको छ । पर्यटन वोर्डका निर्देशक तथा वोर्डका गण्डकी प्रदेश प्रमुख मणि लामिछानेले नेपालमा पर्यटकीय पूर्वाधारको राम्रो व्यवस्थापन भएको जनाउँदै सबैलाई नेपाल भ्रमण गर्न आग्रह गरे ।
युएई विश्व पर्यटकीय गन्तव्य मुलकका रुपमा प्रमुख स्थानमा रहेकाले पनि यहाँ आउने पर्यटकलाई नेपाल लैजान सक्ने अवस्था बने नेपाल पर्यटन वर्षलाई थप मद्दत पुग्ने उनले बताए ।
नेपाली दूतावासकी द्धितीय सचिव तथा सुचना अधिकारी विष्णुकुमारी अधिकारीले स्वागत मन्तव्य राख्दै नेपाल पर्यटकीय गन्तव्य मुलुक रहेको जनाउदै एकपटक भ्रमण गर्न सबैलाई आग्रह गरिन् ।
कार्यक्रममा नेपालको जानकारी समेटिएको विभिन्न प्रश्नसहितको हाजिरी जवाफ राखिएको थियो । कार्यक्रममा नेपाली दूतावासकोतर्फबाट श्रम काउन्सुलर भेषबहादुर कार्की, तृतीय सचिव नारायण ज्ञवालीको उपस्थिति थियो ।
यस्तै नेपाली तथा दक्षिण एसियाली नियोगका प्रतिनिधी तथा पर्यटन व्यवसाय गरिरहेका बिदेशी कम्पनीका प्रतिनिधिहरुको उपस्थिति थियो । चार दिनसम्म चलेको मेलाको अन्तिम दिन नेपालले नेपाली साझको आयोजना गरेको हो । 
