१ साउन, काठमाडौं । सन् २०१९ को ६ महिना अवधिमा नेपाल आउने पर्यटक संख्या अघिल्लो वर्षको तुलनामा सामान्य बढेको छ । नेपाल पर्यटन बोर्डका अनुसार ६ महिना (जनवरी–जुन) मा कूल ५ लाख ८५ हजार ५ सय ३१ जना पर्यटक नेपाल आएका छन् ।
सन् २०१८ को ६ महिनामा ५ लाख २० हजार १४ जना पर्यटक आएका थिए । अघिल्लो वर्षको तुलनामा १२.६० प्रतिशत बढी पर्यटक नेपाल आएको तथ्यांकले देखाएको छ । सन् २०१८ मा २५ प्रतिशतले पर्यटक आगमन बढेको थियो ।
यस वर्षको ६ महिने अवधिको वृद्धिदर भने सुस्त रह्यो । सन् २०१९ सरकारले घोषणा गरेको नेपाल भ्रमण वर्ष २०२० को आधार वर्ष पनि हो । तर, पर्यटनमा उत्साहजनक खबर प्रवाह गर्न नसकेको नेपालमा अहिले मासिक १ लाख पर्यटक भित्र्याउनसमेत मुस्किल देखिएको छ ।
यस अवधिमा ४ लाख ९० हजार ५ सय ३४ जनाले हवाई मार्ग प्रयोग गरी नेपाल आएका छन् भने ९४ हजार ९ सय ९७ पर्यटक भने स्थलमार्गबाट नेपाल भित्रिएका छन् । स्थलमार्गबाट भित्रने भारतीय नागरिकलाई भने पर्यटकमा गणना गरिदैन ।
बोर्डको तथ्यांकअनुसार ६ महिना अवधि भित्रमा यूरोपबाट आउने पर्यटकको संख्या केवल २.३२ प्रतिशतले मात्र बढेको छ । अष्टे«लिया र न्यूजिल्याण्डबाट पनि गत वर्षकै हाराहारीमा पर्यटक भित्रिएका छन्, जसले गर्दा समग्र पर्यटक आगमनमा उत्साहजनक वृद्धि देखिन सकेको छैन । सार्क मुलुकबाट पनि पर्यटक आगमन खस्किएको छ ।
यस अवधिमा बंगलादेश र पाकिस्तान आउने पर्यटक ओरालो लागेको छ । तर, श्रीलंकाबाट भने गत वर्षको तुलनामा ५२.४१ प्रतिशत पर्यटक बढी आएका छन् ।
बौद्धमार्गी देशबाट बढी पर्यटक
६ महिनामा नेपाल भ्रमणमा आउने पर्यटकमध्ये सबैभन्दा बढी उत्साह बौद्धमार्गी बाहुल्य जनसंख्या भएको देशबाट देखिएको छ । श्रीलंकासँगै थाइल्याण्ड र चाइनिज ताइपेइबाट पनि पर्यटक आगमन बढेको छ ।
चीनबाट १९.५३ प्रतिशत पर्यटक बढ्दा भारतबाट भने केवल ७.३६ प्रतिशत मात्र पर्यटक बढेको तथ्यांक छ । नेपाल पर्यटन बोर्डले भने ६ महिनामा देखिएको वृद्धिदरलाई सकारात्मक भनेको छ । युरोपमा सिधा उडान नहुँदाको असर पर्यटक आगमनमा देखिन्छ ।
कहाँबाट कति पर्यटक आए ?
क्षेत्र | सन् २०१८ | सन् २०१९ | वृद्धि प्रतिशत |
सार्क | १३१७३० | १४४९५७ | १०.०४ |
एसिया (सार्कबाहेक) | १४४०३५ | १७४०२७ | २०.८२ |
यूरोप | १०२४०४ | १०४७८३ | २.३२ |
आसियाना | १८६७३ | १८७९० | ०.६३ |
अमेरिकी मुलुक | ५२१६३ | ५७३५४ | ९.९५ |
अन्य | ७१००९ | ८२६६२ | १६.४१ |
कुल | ५२००१४ | ५८५५३१ | १२.६० |
स्रोत : नेपाल पर्यटन बोर्ड