साउनको २४ गतेबाट रिलिज हुन लागेको चलचित्र ‘साइनो’को विशेष शो चितवनमा आयोजना गरिएको छ । लक्की मिडिया हाउसले आयोजना गरेको शोमा चलचित्र हेर्न पुगेका दर्शकले यसको कथावस्तु रुचाएका छन् । दर्शकले चलचित्रलाई मौलिक कथावस्तुमा बनेको भन्दै रुचाएका हुन् ।
चलचित्र हेरिसकेपछि कलाकार नीर शाहले शुद्ध नेपालीपन बोकेको चलचित्र रहेको बताए । उनले चलचित्र क्षेत्रमा संभावना बोकेका नायक र निर्देशक भित्रिएको प्रतिक्रिया पनि दिए । चलचित्रको विशेष शोमा मुख्य कलाकारहरु मिरुना मगर, नीता ढुंगाना, राज कुमार, भूवन चन्द लगायत पुगेका थिए ।
चलचित्रलाई अभिमन्यु निरबीले लेखेका हुन् । शरण थापा कार्यकारी निर्माता रहेको चलचित्रमा रामेश्वर कार्कीको छायांकन, रामजी लामिछानेको कोरियोग्राफी, बनिश शाहको सम्पादन छ । दर्शकको प्रतिक्रियापछि रेगुलर शोमा पनि राम्रो व्यापार हुने अपेक्षा निर्माणपक्षको छ । चलचित्रलाई नायिका भूवन चन्दले निर्माण गरेकी हुन् । रमेश थापाले चलचित्रलाई निर्देशन गरेका हुन् ।
