२१ साउन, काठमाडौं । पाटन उच्च अदालतका न्यायाधीश र कर्मचारीले मुद्दाको पेशी सूची (कजलिस्ट) प्रकाशित भएपछि मोबाइल बन्द गर्नुपर्ने भएको छ ।
हालै सरुवा भएर आएका मुख्य न्यायाधीश नहकुल सुवेदीले अदालतका न्यायाधीश र कर्मचारीलाई पेशी सूची प्रकाशित भएपछि मोवाइल बन्द गर्न निर्देशन दिएका हुन् ।
देशैभरका अदालतहरुमा पेशी सूची प्रकाशित भएपछि न्यायाधीश तथा कर्मचारीलाई फोन गरेर प्रभावित पार्ने गरिएको आरोप लागेका बेला मुख्य न्यायाधीश सुवेदीले मोवाइल बन्द गर्न र आवश्यक कर्मचारीबाहेक न्यायाधीशको चेम्बरमा समेत नजान निर्देशन दिएका उच्च अदालतका एक अधिकारीले बताए ।
यस्तै मुख्य न्यायाधीश सुवेदीले पूर्वाधार अभावले इजलास बस्न नसक्ने अवस्था भए पनि पूरा समय अदालतमा बस्न र पुराना मुद्दा घटाउन न्यायाधीशहरुलाई निर्देशन दिएका छन् ।
