२६ असोज, काठमाडौं । चीनले आफ्नो सहयोगमा निर्मित १० भूकम्प मापन केन्द्र नेपाल सरकारलाई हस्तान्तरण गरेको छ । चिनियाँ राष्ट्रपति सी जिनपिङको राजकीय नेपाल भ्रमणको दोस्रो दिन आइतबार चिनियाँ राष्ट्रपति सी जीनफिङ र नेपालका प्रधानमन्त्री केपी शर्मा ओलीको उपस्थितिमा हिमालसँग जोडिएका १० जिल्लामा निर्मित केन्द्रहरु हस्तान्तरण गरिएको हो ।
भूगर्व विभागका अनुसार संखुवासभा, सोलुखुम्बु, रसुवा, लमजुङ, मुस्ताङ, डोल्पा, मुगु, बाजुरा र दार्चुलालगायत जिल्लामा ती भूकम्प मापन स्टेशन निर्माण भएका छन् । खानी तथा भूगर्भ विभागसँगको सहकार्यमा चीन सरकारको पूर्ण लगानीमा उक्त परियोजनाहरु सम्पन्न भएका थिए ।
यी स्टेशन सञ्चालनपछि नेपालभरको भूकम्पको तथ्यांक मापन गर्न सहज हुने राष्ट्रिय भूकम्प मापन केन्द्रले जनाएको छ । राष्ट्रिय भूकम्प मापन केन्द्र लैनचौर र राष्ट्रिय भूकम्प मापन केन्द्र सुर्खेतबाट देशरभरको भूकम्पका बारेमा जानकारी लिने गरिएको छ ।
