वीरगञ्जको मुख्य सडक छठ लगत्तै विस्तार नहुने संकेत

६ कात्तिक, वीरगञ्ज । त्रिभुवन राजपथ अन्तर्गत वीरगञ्जको मुख्य सडक विस्तारको काम  कात्तिक २४ गतेसम्मका लागि टरेको छ । छठ पर्वपछिदेखि सडक विस्तार गर्ने तयारी सडक विभागले गरेपनि सर्वोच्च अदालतका कारण ढिलाई हुने भएको हो ।

लक्ष्मण साह रौनियार समेतले प्रधानमन्त्री तथा मन्त्रिपरिषद्को कार्यालय सिंहदरबारकोविरुद्ध दायर गरेको मुद्धामा सर्वोच्च अदालतका न्यायाधिश कुमार रेग्मीले बहस सुनेर असोज ८ गते अल्पकालिन अन्तरिम आदेश जारी गरेका थिए । अल्पकालिन अन्तरिम आदेशमा अन्तरिम आदेशका लागि दुबै पक्षलाई बोलाएर छलफल गर्नुपर्ने भएकोले कात्तिक ४ गते पेशी तोकिएको थियो । तर कात्तिक ४ गतेको पेशी २४ गतेका लागि सारेको हो ।

यो पनि पढ्नुहोस

छठपछि वीरगञ्जको मुख्य सडक २५ मिटरनै विस्तार गरिने

वीरगञ्ज बचाउ संघर्ष समितिका सल्लाहाकार राम नारायण कुर्मीले सर्वोच्चले कात्तिक ४ गते दुबै पक्षसँग गर्ने भनिएको छलफल २४ गतेलाई सारेको जानकारी दिए ।

पछिल्लो पटक भदौ ६ गते नेपाल सरकार भौतिक पूर्वाधार तथा यातायात मन्त्रालय, सडक विभाग उत्तर–दक्षिण व्यापारिक मार्ग विस्तार आयोजनाले त्रिभुवन राजपथ अन्तर्गत गण्डक–घण्टाघर–रक्सौल सडकखण्डमा घर टहरा हटाउने सूचना जारी गरेको थियो ।

त्यसपछि मुख्य सडकमा पर्ने घरका धनी सडक विस्तार गर्दा आफूहरु मर्कामा पर्ने भन्दै अदालत गुहार्न पुगेका थिए । निवेदनमा उनीहरुले घर टहरा लगायतका संरचना तिरो भोगमा रही निर्माण गरेकोले क्षतिपूर्ति निर्धारण नगरी भत्काउन नदिन अन्तरिम आदेशको माग गरेका छन् ।

यो पनि पढ्नुहोस

वीरगञ्जमा मुआब्जा नदिई सडक विस्तार गर्न पाइदैन : कांग्रेस

व्यापारिक मार्ग विस्तार आयोजनाले सडक विस्तारको तयारी गरिरहेको थियो ।

पथलैया–परवानीपुर–गण्डकसम्मको सडकखण्डमा त्रिभुवन राजपथको अधिकार क्षेत्र केन्द्र बिन्दुबाट दायाँ बायाँ २५/२५ मिटर विस्तार भइसकेको छ । वीरगञ्जको मुख्य बजार हुँदै जाने गण्डक–घण्टाघर–रक्सौल सडकखण्ड विस्तार हुन बाँकी छ ।

यो पनि पढ्नुहोस

त्रिभुवन राजपथ विस्तार : केन्द्र सरकार र महानगरको विवादले अन्योल

मुआब्जा नदिइ सडक विस्तार गरेर आफूहरुको बिल्लीबाठ नपार्न वीरगञ्ज मुख्य सडकका घरधनीहरुले आग्रह गर्दै आएका छन्, त्यसमा यहाँका राजनीतिक दल, उद्योग वाणिज्य संघ लगायतले समर्थन जनाउँदै आएका छन् ।

यो पनि पढ्नुहोस

वीरगञ्जको सडक विस्तार गरेर बिल्लीबाठ नपार्न घरधनीहरुको आग्रह

वीरगञ्ज महानगरपालिकाले वैकल्पिक सडक निर्माण भइसकेका कारण १५/१५ मिटर मात्रै फराकिलो गर्न आग्रह गर्दै आएको छ । भने कतिपयले अतिक्रमण गरेर घर टहरा बनाएकोले २५/२५ मिटर नै फराकिलो गर्नुपर्ने आवाज उठाउँदै आएका छन् ।

हालका प्रतिनिधिसभा सदस्य विमल श्रीवास्तव तत्कालिन वीरगञ्ज उपमहानगरपालिकाको प्रमुख हुँदा ०५८ माघ १० गते बोर्ड बैठक बसेर विल्डअप एरिया घोषणा गर्न सरकारसँग माग गरेका थिए । तर त्यो माग विभिन्न कारणले पुरा हुन सकेन । सडक विभागले पटक पटक सूचना जारी गरेपनि सडक विस्तार गर्न सकेको छैन ।