२१ कात्तिक, गुल्मी । दुबै मृगौला फेल भएका गुल्मीको तम्घास-८ का १५ वर्षीय बालक अनमोल श्रेष्ठलाई जापानमा रहेका प्रवासी नेपालीहरुले आर्थिक सहयोग गरेका छन् । दुबै मृगौला फेल भएका बालक श्रेष्ठको अहिले काठमडौंमा उपचार भइरहेको छ ।
मृगौला पीडित बालक श्रेष्ठको उपचारका लागि जापानमा रहेका नेपालीहरुबाट संकलित २ लाख ४१ हजार ७ सय ७५ रुपैयाँ रकम बिहीवार तम्घासमा एक कार्यक्रमकाबीच हस्तातरण गरिएको हो ।
जापानबाट आएका लालबहादुर कार्की, गोबिन्द पाण्डे, प्रवीन कार्की लगायतको टोलीले पीडित बालककी हजुर आमा मायादेवी शाक्यलाई उक्त नगद रकम हस्तातरण गरेका हुन् ।
रेसुङ्गा माध्यमिक विद्यालयबाट एसईई परीक्षा दिएका श्रेष्ठ केही महिना यता दुबै मृगौला फेल भएपछि काठमाडौंमा उपचार गराइ रहेका छन् ।
उनको उपचार गर्न धेरै रकम लाग्ने भएपछि पीडितको परिवारले सहयोगको अपिल गरेका थिए ।
जापानमा रहेका लोक दोहोरी गीत प्रतिष्ठान गुल्मीका आजीवन सदस्य लालबहादुर कार्की, गोबिन्द पाण्डे, निरज कार्की लगायतको सक्रियतामा जापानमा रहेका ५४ जना गुल्मेलीले उक्त रकमको व्यवस्था गरेका थिए ।
