२१ कात्तिक, जनकपुरधाम । सरकारी अस्पतालमा उपचार गराउन आउने बिरामीलाई ललाई फकाई नीजि क्लिनिकमा लैजाने गरेको आरोपमा प्रहरीले दुई जना बिचौलियालाई जनकपुरधामबाट नियन्त्रणमा लिएको छ ।
जनकपुरधामस्थित प्रादेशिक अस्पतालको ओपिडी सेवामा उपचारका लागि आउने बिरामी तथा बिरामीका आफन्तलाई अन्यन्त्र नीजि क्लिनिकमा लगेर बिचौलियाको काम गर्ने उनीहरुलाई बिहीबार नियन्त्रणमा लिइएको जिल्ला प्रहरी कार्यालय धनुषाले जनाएको छ ।
पक्राउ पर्नेमा जिल्ला धनुषा जनकपुर उप–महानगरपालिका वडा नम्बर ८ बस्ने २५ बर्षीय मन्नु सिंह भनिने निर्मल साह र सोही ठाउँका ४० बर्षीय राजेश यादव छन् ।
दुबै जना बिचौलियाको काम गर्ने गरेको विशेष सूचनाको आधारमा जिल्ला प्रहरी कार्यालयबाट खटिएको टोलीले पक्राउ गरी सार्वजनिक शान्ति विरुद्धको कसुर शिर्षकमा मुद्दा दर्ता गरिएको प्रहरीको भनाई छ ।
