२० मंसिर, हेटौंडा । नेपाल कम्युनिष्ट पार्टीका वरिष्ठ नेता माधवकुमार नेपालले भर्खरै सम्पन्न भएको उपनिर्वाचनले कम्युनिष्टलाई बेलैमा सच्चिन सचेत गराएको बताएका छन् । जितेको ठाउँ हारेपछि अब दम्भ छोडेर सच्चिने बाटोमा लाग्न जनताले निर्देशन दिएको बुझ्नुपर्ने नेता नेपालको भनाइ छ ।
धरान, भक्तपुर र चितवनको नतिजाले जनताले होस गर है अहंकार नगर भन्ने सन्देश दिएको उनले बताए । पोखरा र दाङ जितेका छौं भनेर कमजोरी सुधार्नतिर नलागे आउँदा दिनमा अझ कमजोर बनिने नेता नेपालले बताए ।
मकवानपुरको मनहरि गाउँपालिकाको रमौली–प्रतापपुरमा भएको कार्यक्रममा पूर्वप्रधानमन्त्री समेत रहेका नेता नेपालले पार्टी कमिटी भद्दा भएको टिप्पणी गरे । उनले पार्टीको केन्द्रीय कमिटीदेखि स्थानीय तहसम्म कमिटीहरु भद्दा बनेको बताएका हुन् । यस्ता कमिटीबाट पार्टी चलायमान हुन नसक्ने उनको तर्क छ ।
कम्युनिष्ट पार्टीको विरोध गर्नेहरुलाई पार्टीले ठुला पदमा पु¥याएको भन्दै नेता नेपालले नातावाद र कृपावाद तोड्न जरुरी रहेको धारणा राखे । अब केही दिनमै स्थायी कमिटीको बैठक बस्न लागेकाले उपनिर्वाचनको समीक्षा र पार्टी एकताको सबै काम टुङ्गिने विश्वास व्यक्त गरे ।
बोटे बस्तीमा माधव नेपाल
प्रशिक्षण कार्यक्रममा सहभागी हुन मकवानपुरको मनहरी पुगेका नेता नेपाल रमौली प्रतापपुरमा रहेको बोटे बस्तीमा पुगेका छन् । त्यहाँ उनले सरकारले निर्माण गरिदिएको नमुना बस्तीको अवलोकन गरे ।
गाउँमा पुगेका नेतालाई बोटे समुदायले माछा मार्ने लाइसेन्स निकुञ्जले नवीकरण नगरिदिएको गुनासो गरे ।
सरकारले यस क्षेत्रमा रहेका १२ घर बोटे जातीलाई रमौंली प्रतापपुरमा जमिन सहित आवासको व्यवस्था गरिदिएको छ । उनीहरुलाई बस्ती स्थानान्तरणका समयमा ५ कठ्ठा जमिन दिने भने पनि नपाएको स्थानीयले गुनासो गरे ।
नेपाल प्रधानमन्त्री रहेका बेला २०६७ साल असार ८ गतेको मन्त्रिपरिषद बैठकले बस्ती सार्ने निर्णय गरी राप्तीपारिका दुईवटा वडालाई राप्तीवारी स्थानान्तरण गरेको थियो ।
