२३ मंसिर, हेटौंडा । प्रदेश ३ सरकारले १३औं दक्षिण एशीयाली खेलकुद (साग) पदक जित्ने प्रदेशभित्रका खेलाडीहरुलाई नगद पुरस्कार दिने भएको छ ।
मन्त्रिपरिषदको सोमबार बसेको बैठकले सागका स्वर्ण पदक विजेतालाई १ लाख, रजत विजेतालाई ५० हजार र कास्य विजेतालाई २५ हजार नगद सहित सम्मान गर्ने निर्णय गरेको हो । प्रदेश सरकारले दिने नगद पुरस्कार पदक विजेता प्रदेश ३ का खेलाडीहरुले मात्र पाउने सरकारका प्रवक्ता आर्थिक मामिला तथा योजनामन्त्री कैलाश ढुङगेलले जानकारी दिए ।
बैठकले प्रदेश अनुसन्धान ब्यूरो गठनका लागि सैद्धान्तिक सहमति दिएको छ भने जनता आवास कार्यक्रम कार्यान्वयन पहिलो संशोधन कार्यविधि, मुख्यमन्त्री जनता स्वास्थ्य परीक्षण कार्यक्रम संचालन कार्यविधि स्वीकृत गरेको छ ।
