Comments Add Comment

‘पुलिसलाई विपक्षीले दुःख दिन थालेको छ’

गर्विलो इतिहास बोकेको पुलिस र परिवर्तित फुटबल

२० पुस, काठमाडौं । नेपालको पहिलो श्रेणीको लिग शहीद स्मारक ए डिभिजन लिगमा तीन क्लबले मात्र लगातार तीन पटक उपाधि जित्दै ह्याट्रिक गरेको छ । त्यो उपलब्धी हासिल गर्ने पछिल्लो क्लब हो, नेपाल पुलिस क्लब ।

त्यसअघि रानीपोखरा कर्नर टिम (आरसीटी) र मनाङ मर्स्याङ्दीले लगातार तीन पटक उपाधि जितेको थियो । २०६० मा लिगमा प्रवेश पाएको पुलिसले ६० को मध्य दशक लिगमा एकछत्र राज नै गर्‍यो । ०६० र ०६१ सालमा दोस्रो भएको पुलिस २०६१ मा चौथो भयो । तर २०६३ मा पहिलो पटक उपाधि जित्यो ।

एन्फा र क्लबबीचको द्वन्द्वका कारण बीचमा तीन वर्ष लिग भएन । २०६६ सालमा पुनः शुरु भएको लिगमा पुलिसले लगातार दुई वर्ष उपाधि जित्दै ह्याट्रिक गर्‍यो ।

पुलिसले पहिलो पटक लिग जित्दा खेलेका केही खेलाडीहरु अहिले पनि लिगमा देखिन्छन् । पुलिसबाट लगातार तीन पटक लिग जितेका अनन्त थापा अहिले पुलिसको प्रशिक्षक छन् भने जुमानु राई, भोलानाथ सिलवाल, सुमन सुवेदी जस्ता खेलाडी अहिले पनि पुलिसबाटै ए डिभिजन लिग खेलिरहेका छन् ।

दुई पटक ए डिभिजन लिग जित्दा टिममा रहेको रविन श्रेष्ठ पनि लिग खेलिरहेका छन् । त्यसबेला हरि खड्का, रमेश बुढाथोकी, पर्वत पाण्डेजस्ता खेलाडीहरु पनि पुलिसको टिममा थिए । तर पुलिसको लय भने ६० को दशकको जस्तो छैन ।

धेरै परिवर्तन आइसकेको छ । पुलिसले घरेलु फुटबलमा राज गर्दा खेलाडी रहेको अनन्त थापा पनि यो स्वीकार गर्छन् । गत वर्ष लिगमा प्रशिक्षकको रुपमा डेब्यु गरेका अनन्त भन्छन्, हामीले लिग जित्दा र अहिलको फुटबलमा धेरै परिवर्तन भइसकेको छ । टेक्नोलोजीमा पनि धेरै परिवर्तन भइसकेको छ ।’

हुन पनि त्यतिबेला पुलिस क्लबको घरेलु फुटबलमा छुट्टै शान थियो । हार्न लागेको खेल पनि जित्ने क्लबको छवि बनाएको उसले नकआउट टर्नामेन्टमा पनि राज गर्‍यो । नेपालको दुई चर्चित क्लब मनाङ मर्स्याङ्दी र थ्री स्टारलाई पनि पछाडि पारेका कारण खेलाडीहरुको रोजाइ पनि पुलिस क्लब नै बन्यो ।

‘राष्ट्रिय टिमका अधिकांश खेलाडी पुलिसकै हुन्थे । त्यतिखेर ८-९ पुलिसका खेलाडी राष्ट्रिय टिममा हुन्थे । त्यसो भएपछि अरु टिम त्यसै कमजोर हुन्थ्यो’ प्रशिक्षक अनन्तले भने,‘अन्य टिमले खासै राम्रोसँग तयारी नै गर्न पाएको हुदैनथ्यो । ’

यसरी जित्यो पुलिसले लगातार ३ पटक लिग

अहिले तीन विभागीय क्लबले लिग खेलिरहेका छन् । पुलिसलाई पछ्याउँदै त्रिभुवन आर्मी र सशस्त्र प्रहरीको एपीएफ क्लब लिगमा आयो । तर दुबैले लिग जित्न सकेको छैन । आर्मी एकपटक उपाधि नजिक पुगे पनि च्याम्पियन बन्न सकेन ।

पुलिसले लगातार तीन पटक लिग जितेर इतिहास रच्यो कसरी सम्भव भयो त ? अनन्त थापाको भनाइ मान्ने हो भने राष्ट्रिय टिमका खेलाडी हुनुका साथै खेलाडीहरु व्यक्तिगत रुपमा पनि उत्कृष्ट थिए । ‘त्यतिखेर इन्डिभिजुएल्ली ब्रिलियन्ट खेलाडीमा थिए । अहिले मेसी र रोनाल्डो भने जस्तै’ पुराना दिन सम्झिँदै अनन्त भन्छन्, ‘जसरी पनि जित्नुपर्छ भन्ने हुनुथ्यो ।’

अनन्तसँगै पर्वत पाण्डे, भोला सिलवाल जुमानु राईजस्ता खेलाडीले पुलिसको मिडफिल्ड सम्हाल्थे । हरि खड्का र रमेश बुढाथोकी फरवार्डमा खेल्थे । डिफेन्समा राकेश श्रेष्ठ, सुमन सुवेदी, दीपक पौडेल र नरोत्तम गौतम थिए ।

यही टिमले ०६३ सालमा पुलिसलाई लिग जिताएको थियो । त्यसबेला पुलिस टिमलाई पराजित गर्नु अन्य क्लबका लागि फलामको चिउरा सहज हुन्थ्यो । त्यसैले त लगातार तीन पटक लिग जित्ने क्रममा पुलिसले जम्मा दुई खेल मात्र हार्‍‍यो । र, लिगमा ४९ खेलसम्म अपराजित रहने कीर्तिमान पनि लेखायो ।

२०६३ सालमा पहिलो पटक लिग जित्दा पुलिस १५ औं चरणमा ब्वाइज युनियनसँग ३–० ले पराजित भएको थियो । त्यसपछि बाँकी ११ खेलमा पुलिस अपराजित रह्यो । दोस्रो पटक लिग जित्दा पुलिस २२ खेलमा अपराजित रह्यो । तेस्रो पटक लिग जित्दा भने अन्तिम खेलमा मनाङ मर्स्याङ्दी क्लबसँग पराजित भयो र ५० खेलसम्म अपराजित रहने लक्ष्य पूरा भएन ।

त्यसबेला पुलिस, मनाङसँग १–० ले हारेको थियो । मनाङका लागि अनिल गुरुङले गोल गरेका थिए । त्यो क्षण सम्झँदा सुमन सुवेदी अहिले पनि नरमाइलो मान्छन् ।

विपक्षीले दुःख दिन थालेको छ

पहिला पुलिस टिमदेखि अरु क्लब डराउँथे । अहिले पुलिस अरु क्लब देखेर सजग हुन थालेको छ । किनकी अन्य क्लबले दुःख दिन थालेको प्रशिक्षक अनन्तको बुझाइ छ । यो सबै फुटबलमा आएको परिवर्तनको कारण मान्छन् उनी ।

हुन पनि दशकअघि लिगमा एकथरि बलिया क्लब उपाधि होडमा हुन्थे भने अर्काथरी कमजोर क्लब हुन्थे, जो रेलसगेसनबाट जोगिन संघर्ष गर्थे । तर अहिले समय फेरिएको छ । को बलियो को कमजोर भन्ने नै छैन, सबै उस्तै देखिएका छन् ।

पुलिस क्लबका प्रशिक्षक अनन्त भन्छन्, ‘आफूले राम्रो खेल्दा पनि विपक्षीले दुःख दिन थालेको छ ।’

प्रशिक्षक अनन्तले पुलिसलाई पुरानै लयमा फर्काउन समय लाग्नेसमेत सुनाए । यसको एउटा कारण, पहिला खेलाडीहरुको पहिलो रोजाइमा पुलिस क्लब पथ्र्यो । अहिले अरु क्लबले पनि विभागीय टिमले जस्तै सुविधा दिन थालेको छ । ‘२०६३ मा मा लिग खेल्दा पुलिस र थ्रीस्टारका खेलाडीहरुको उस्तै पारिश्रमिक थियो । तर अहिले समय फेरिएको छ’ प्रशिक्षक अनन्तले भन्छन् ।

लिगमा राम्रो स्थान ल्याउने लक्ष्य

पहिला पुलिस च्याम्पियन बन्नका लागि खेल्थ्यो । तर अहिले पुलिस राम्रो स्थानका लागि खेलिरहेको छ । यसलाई प्रशिक्षक अनन्तले पनि राम्ररी बुझेका छन् । उनी भन्छन्, ‘हामीले लिग अघि पनि भनेका थियौँ । टार्गेट सुपर सिक्स भनेर ।’

तर लिगमा पछिल्ल्ला दुई खेल जितेपछि खेलाडीमा हौसला बढेको र अझै राम्रो गर्न प्रेरित भएको उनले सुनाए । ‘हामी अहिले पाँचौं स्थानमा छौं । अझ राम्रो गर्नुपर्छ, राम्रो रिजल्ट ल्यायौं भने अझमाथि पुग्न सक्छौं’ अनन्तले भने ।

खेलाडी भोला सिलवालले पनि खेलाडीहरुमा लिग जितौं भन्ने चाहना कायम रहेको सुनाए । ‘चाहना त लिग जित्नै नै हुन्छ’ उनले भने, ‘धेरै भयो हामीले नजितेको पनि । हामी पनि जितौं भन्ने मानसिकता त भइहाल्छ नि ।’

तर पुलिसले शुरुवाती खेलमा त्यसअनुसार प्रदर्शन गरेन । सिनियर र जुनियरको मिक्स टिम बनाएको पुलिसले हिमालयन शेर्पासँग गोलसहित बराबरी खेल्दा थ्रीस्टारसँग १–० को हार व्यहोर्‍यो । रविन श्रेष्ठ र सुमन सुवेदी थपिएपछि भने सुधार आएको छ र सरस्वती र शंकटा क्लबलाई हराएको छ ।

सुखद बिदाइको आशा

भोला, सुमन र रविन तीनै खेलाडी चोटलाई जित्दै फुटबलमा पुनरागमन गरेका हुन् । तीन खेलाडीले धेरै संघर्ष समेत गरे । कुनै बेला तीन जना नै राष्ट्रिय टिममा थिए । त्यसमा जुमानु राई पनि थिए । रविन र सुमन डिफेन्समा भोला मिडफिल्डमा अनी जुमानु फरवार्डमा । तर विस्तारै टिमबाट बाहिरिए ।


चारै जनाले राष्ट्रिय टिमबाट सन्यास भने लिएका छैनन् । अब उनीहरु सुखद बिदाइमा अपेक्षामा छन् ।

सुमन र भोलाले अब राष्ट्रिय टिममा पर्ने सम्भावना देखेका छैनन्, चाहना पनि छैन भन्दा हुन्छ ।

तर सुदख बिदाइको अपेक्षा भने छ । हुन त यो सिजन ए डिभिजन लिग शुरु हुनुअघि भोलाले नेपाल निलोको कप्तानी गर्दै जापानी टोलीविरुद्ध खेलेका थिए ।

तर त्यो अफिसियल खेल थिएन । कतिपयले भोलाको त्यो नै राष्ट्रिय जर्सीमा अन्तिम खेल भने । भोलाकाअनुसार उनले त्यसबेला यो अन्तिम खेल भनेर खेलेको होइनन् । आइतबार ३४ औं बसन्त पार गरेका भोलाले अघि भने, ‘मैले प्रधानमन्त्री कप खेल्दा पनि निलो जर्सीबाटै शुरु भएको थियो । त्यसपछि ८ वर्ष राष्ट्रिय टिममा खेलेँ । अहिले पनि निलोबाटै अन्त्य होला जस्तो छ ।’

रविनले भने अझै पुनरागमन गर्ने सम्भावना देखेका छन् । क्लबका लागि राम्रो गर्न सके राष्ट्रिय टिममा फर्कन मदत गर्ने उनले सुनाए । ‘अहिले मेरो ध्यान लिगमै छ’ उनले भने, ‘क्लबमा राम्रो प्रदर्शन गर्न चाहन्छु, त्यसपछि राष्ट्रिय टिम नै हो ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment