१३ चैत, काठमाडौं । राष्ट्रिय सभा अन्तर्गतको दिगो विकास तथा सुशासन समितिकी सभापति तारादेवी भट्टले समुदायस्तरमै कोरोना भाइरसको परीक्षण गर्ने व्यवस्था मिलाउन माग गरेकी छन् ।
बिहीबार बक्तव्य निकालेर उनले समुदायस्तरमै स्वास्थ्यकर्मीको क्षमता अभिवृद्धि गरी आवश्यक सामग्री उपलब्ध गराएर कोरोना भाइरस परीक्षणको व्यवस्था यथाशीघ्र गर्न सरकारसमक्ष माग गरेकी हुन् ।
स्वास्थ्यकर्मीहरुलाई महामारीविरुद्ध तालिमको व्यवस्था गरेर आवश्यकताअनुसार नयाँ ठाउँहरुमा स्वास्थ्य सेवा केन्द्रहरुको स्थापना गर्न सरकारलाई उनको सुझाव छ ।
क्वारेन्टाइनको लागि स्पष्ट योजना र प्रक्रिया सुनिश्चितता गर्न समेत सभापति भट्टले माग गरेकी छन् । योजना बनाउँदा प्रदेश सरकार र स्थानीय सरकारलाई अत्यन्त महत्वका साथ प्राथमिकतामा राखेर बनाइनुपर्ने पनि उनले बताएकी छन् ।