७ जेठ, काठमाडौं । नेपाली कांग्रेस, रूपन्देहीले कोरोना संक्रमितबारे गलत सूचना प्रवाह गर्ने प्रदेश ५ का सामाजिक विकास मन्त्री सुदर्शन बराल र तिलोत्तका मेयर वासुदेव घिमिरेलाई सार्वजनिक माफी माग्न सुझाव दिएको छ ।
रूपन्देहीको तिलोत्तमामा अवस्थित क्रिमसन अस्पतालको आईसीयूमा उपचाररत गुल्मी मदानेका संक्रमितबारे मंगलबार सञ्चारमाध्यमहरूमा गलत सूचना प्रवाह भएको थियो । जसमा प्रदेशका मन्त्री र नगरपालिकाका मेयरको भूमिका रहेको भन्दै कांग्रेसले संक्रमितको परिवारसमक्ष सार्वजनिक माफी माग्न सुझाव दिएको हो ।
‘सम्बन्धित निकायबाट बिरामीको मृत्यु भएको आधिकारिक पुष्टि नभएको अवस्थामा बिरामीलाई मृतक घोषणा गर्न हतार गर्ने मानवीय मूल्यहीन र संवेदनाहीन मन्त्री बराल र मेयर घिमिरेले बिरामीको परिवारसँग सार्वजनिक रूपमा माफी माग्न र आगामी दिनमा जवाफदेही बन्न सुझाव दिन चाहन्छौं,’ कांग्रेस रूपन्देहीद्वारा जारी विज्ञप्तिमा भनिएको छ ।
कांग्रेसले क्रिमसनमा उपचाररत बिरामीको सुरक्षित रूपमा उपचार हुने विश्वास परिवारमा दिलाउन मागसमेत गरेको छ ।