एफडी कम्पनीका एमडीलाई माधव वाग्लेको चुनौती

चलचित्र वितरण कम्पनी एफडीका एमडी सुशिल पोखरेललाई निर्माता माधव वाग्लेले चुनौती दिएका छन् । एफडी कम्पनीले निर्माता संघका उच्च पदस्थ व्यक्तिहरुले नै रकम नतिरेको भन्दै नाम सार्वजनिक गर्ने चेतावनी दिएसँगै माधवले सुशिललाई चुनौती दिएका हुन् ।

वाग्ले भन्छन्–‘एफडी कम्पनीका एमडी सुशिल पोखरेलले निर्माता संघका कार्यसमितीकै व्यक्तिहरुले पैसा नदिएको भनेर आरोप लगाउँदा यसले निर्माता संघलाई नै बदनाम बनाएको छ । यदि, निर्माता संघका कार्यकारी समितीमा रहेका व्यक्तिहरुले रकम फिर्ता गर्नुपर्ने छ भने प्रमाणसहित नाम सार्वजनिक गर्नुहोस् । होइन भने बारम्बार निर्माता संघको बदनाम बनाउने काम नगर्नुहोस् ।’

उनले, कुनै निर्मातासँगको आर्थिक कारोवार बाँकी भए यसलाई सझदारीमा टुंग्याउन आग्रह गर्दै यसका लागि निर्माता संघले पहल गर्ने समेत बताएका छन् ।

निर्माता र वितरकविच हुने व्यवसायीक कारोबारलाई नितान्त व्यक्तिगत तवरमा समाधान गरिनुपर्नेमा निर्माता संघको नाम जोड्दै बदनाम गर्न खोजिएको भन्दै वाग्ले आक्रोशित भएका हुन् । वाग्लेले भने–‘कतिपय निर्माता देश छाडेरै गैसके होलान् । कतिपय निर्माताले अरु कारोबार गरिरहेका होलान् । उनीहरुसँग भएको सहमती अनुसार कि त कारोबार गर्नुपर्यो कि त निर्माताले पैसा नदिएको हो भने नाम सार्वजनिक गर्नुपर्यो ।’

निर्माता रोहित अधिकारीले चलचित्र ‘छ माया छपक्कै’को करिब डेढ करोड रुपैयाँ एफडी कम्पनीबाट लिन बाँकी रहेको बताइरहँदा एफडी कम्पनीले भने आफूहरुसँग एड्भान्स रकम लिएर नतिर्ने निर्माताको नाम सार्वजनिक गर्ने अल्टिमेटम समेत दिएको छ ।