२ कात्तिक, काठमाडौं । मदन पुरस्कार गुठीले प्रत्येक वर्ष आयोजना गर्ने मदन पुरस्कार तथा जगदम्बाश्री सम्मान अर्पण समारोह पहिलोपल्ट अनलाइनमार्फत सम्पन्न भएको छ । गुठीले कोरोना महामारीलाई मध्यनजर गर्दै अनलाइनमार्फत समारोह प्रत्यक्ष प्रसारण गरेको हो ।
कात्तिक २ गते आइतबार ३ बजे गुठीको वेवसाइट, फेसबुक तथा युट्युबाट प्रत्यक्ष प्रसारण गरिएको कार्यक्रममा भारत नैनीतालबाट इतिहासबार शेखर पाठकले महाकाली नदी वारिपारिको सीमाको इतिहासबारे विद्वत प्रवचन दिए ।
जगदम्बाश्री सम्मानबाट सम्मानित वरिष्ठ संगीतकार शान्ति ठटालले दार्जिलिङबाट आफ्नो मन्तव्य वाचन गरिन् । यस्तै महारानी उपन्यासमार्फत २०७६ सालको मदन पुरस्कार विजेता लेखक चन्द्रप्रकाश बानियाँले पोखराबाट आफ्नो मन्तव्य वाचन गरे ।
कार्यक्रममा संगीतकार ठटालले संगीतको कुनै सीमा नहुने भन्दै नेपाली संगीतको सेवामा जीवन अर्पण गर्न पाउँदा गौरवान्वित भएको बताइन् । मदन पुरस्कार विजेता उपन्यासकार चन्द्रप्रकाश बानियाँले भने इतिहासको एउटा घटनालाई लिएर आफूले लेखेको उपन्यास पुरस्कारकै कारण साहित्यिक खुराक बनेको स्वीकारोक्ति दिए ।
कार्यक्रमको सुरुमा संगीतकारको एक टोलीले स्वागत धुन प्रस्तुत गरेको थियो । एक घण्टाको समारोहमा आयोजकका तर्फबाट मदन पुरस्कार गुठीका अध्यक्ष कुन्द दीक्षितले आभार व्यक्त गरे । कार्यक्रमको प्राविधिक संयोजन गुठीको कार्यालय पाटनढोकाबाट भएको थियो ।
मदन पुरस्कार गुठीले २०१३ सालदेखि मदन पुरस्कार र २०४५ सालदेखि जगदम्बाश्री सम्मान दिँदै आएको छ ।
