२३ मंसिर, काठमाडौं । दक्षिण अफ्रिका र इंग्ल्याण्डबीचको ओडिआई सिरिज रद्द भएको छ । दुवै टिमको क्याम्पमा कोरोना टेष्ट पोजेटिभ देखिएपछि इंग्लयाण्डको बाँकी टुरका खेल रद्द गरिएको हो ।
घरेलु टोली दक्षिण अफ्रिकाको एक खेलाडी र दुई जना होटल स्टाफलाई कोरोना संक्रमण देखिएको थियो । उता इंग्ल्याण्डले भने आफ्नो दुई सदस्यलाई कोरोना पोजेटिभ भएको अपुष्ट खबर प्राप्त भएको जनाएको छ ।
दुई टिमबीच तीन खेलको टी-२० सिरिज भने सम्पन्न भइसकेको छ । तर तीन खेलको ओडिआई सिरिज भने कोरोना संक्रमणकै कारण स्थगित भएको थियो ।
दक्षिण अफ्रिका क्रिकेटले एक विज्ञप्ती जारी गर्दै खेलाडीको मानसिक र शारीरिक स्वास्थ्य सुनिश्चित गर्न टुर रद्द गरेको जनाएको छ ।
इंग्ल्याण्ड आफ्ना सदस्यको कोरोना पोजेटिभ परिक्षणको अनुमोदन पर्खिरहेको छ । प्रभावित दुई व्यक्तिको सोमबार फेरि परिक्षण गर्ने तयारी छ ।
उ परिक्षणको नतिजा मंगलबार अघि आउने छैन र इंग्ल्याण्डले अनुमति प्राप्त गर्नुअघि दक्षिण अफ्रिका छाड्न पाउने छैन ।
इंग्ल्याण्ड तथा वेल्स क्रिकेट बोर्ड (ईसीबी) र क्रिकेट साउथ अफ्रिका(सीएसए)ले ओडिआईको फेरि तालिका बनाउनका लागि कोसिस गर्ने जनाएको छ । उक्त सिरिज आइसीसीको सुपर लिग अन्तर्गतको सिरिज हो ।
ईसीबीका प्रमुख कार्यकारी टम ह्यारिसनले आफूहरुले सँधै आफ्नो खेलाडी र ब्यवस्थापनको स्वास्थ्यलाई ध्यान दिएको बताएका छन् ।
सीएसएका कार्यवाहक प्रमुख कार्यकारी कुगान्ड्री गोवेन्डरले भने ‘हालसालै भएका घटनाहरूको मानसिक स्वास्थ्यमा पर्ने असरबारे चिन्ता भनेको सीएसए वा ईसीबीको रूपमा हामीले हल्का लिदैनौं, र भ्रमण स्थगित गर्ने निर्णय हाम्रो लागि सबैभन्दा जिम्मेवार र व्यावहारिक मार्ग हो ।’
