५ फागुन, काठमाडौं । नेपाली कांग्रेसको १४औं महाधिवेशन आगामी भदौ दोस्रो साता गर्ने प्रस्ताव केन्द्रीय कार्यसमितिमा पेश भएको छ । यद्यपि यो मितिमा १०/१५ दिन तलमाथि हुनसक्ने नेताहरुले बताएका छन् ।
पाँच वर्षमा पनि महाधिवेशन गर्न नसकेपछि कांग्रेसले संविधानअनुसार ६ महिना म्याद थपका लागि केन्द्रीय कमिटी बैठक बोलाएको छ । पार्टी कार्यालय सानेपामा बसेको बैठकमा महामन्त्री पूर्णबहादुर खड्काले विधानको धारा ४३ मा ६ महिना म्याद थपको व्यवस्था राख्ने प्रस्ताव गरे ।
साथै भदौ ७-१० गतेसम्म महाधिवेशन गर्ने गरी नर्या कार्यतालिका समेत बैठकमा पेश गरेका छन् । प्रस्तावित कार्यतालिकाअनुसार जेठ मसान्तभित्र क्रियाशील सदस्यताबारे परेको उजुरी छानजिन गरेर अन्मि निर्णय गर्ने र सभापथिलाई अन्तिम सूचि बुझाइने छ भने २० असारबाट निर्वाचन सुरु हुनेछ ।
| क) गाउँ/नगर वडा अधिवेशन- | २०७८ असार २० गते |
| ख) गाउँ/नगरपालिका अधिवेशन- | २०७८ असार २२ गते |
| ग) प्रदेश सभा क्षेत्रीय अधिवेशन – | २०७८ असार २५ गते |
| घ) प्रतिनिधि सभा क्षेत्रीय अधिवेशन/एक मात्र प्रतिनिधि सभा निर्वाचन क्षेत्र भएको जिल्ला अधिवेशन – | २०७८ असार २७ गते |
| ङ) एक भन्दा बढी प्रतिनिधि सभा निर्वाचन क्षेत्र भएको जिल्ला अधिवेशन – | २०७८ असार ३० गते |
| च) प्रदेश अधिवेशन- | २०७८ श्रावण ६ गते |
| छ) केन्द्रीय महाधिवेशन – | २०७८ भाद्र ७,८,९ र १० काठमाडौं |
बैठकअघि सभापति शेरबहादुर देउवा र वरिष्ठ नेता रामचन्द्र पौडेल पक्षबीच छलफल भएपनि सहमति हुन सकेको छैन । एक नेता भन्छन्, ‘भोलिसम्म यसलाई टुग्याउने सहमति भएको छ ।’
उनका अनुसार प्रस्तावित मिति १०/१५ दिन तलमाथि हुनसक्छ ।
