१३ फागुन, सुर्खेत । अखिल नेपाल फुटबल संघ (एन्फा) ले राष्ट्रियस्तरको प्रतिस्पर्धाका लागि कर्णाली प्रदेशमा १३ वर्षभन्दा कम उमेरका खेलाडी छनोट गर्ने भएको छ ।
फागुन १८ र १९ गते वीरेन्द्रनगरमा ग्रासरुट फुटबल प्रशिक्षणका लागि १३ वर्ष मुनिका खेलाडीको छनोट गर्न लागेको कर्णाली प्रदेश फुटबल संघका महासचिव गणेशकुमार कार्कीले जानकारी दिए ।
कर्णालीका सुर्खेत र जुम्ला जिल्लामा सञ्चालित ग्रासरुट फुटबल प्रशिक्षणमा सहभागी मध्येबाट राष्ट्रियस्तरको प्रतिस्पर्धाका लागि खेलाडी छनोट गर्न लागिएको हो ।
जिल्लास्तरमा सम्पन्न प्रारम्भिक चरणको छनोटबाट सुर्खेतका २६ जना बाल खेलाडी दोस्रो चरणमा परेका छन् । अब तीमध्येबाट राष्ट्रिय स्तरको प्रतिस्पर्धाका लागि खेलाडी छनोट हुनेछन् ।
आधारभूत तहदेखि नै फुटबलको विकास गर्न बालखेलाडी छनोट गरिएको महासचिव कार्कीले बताए । वीरेन्द्रनगरस्थित रंगशालामा हुने छनोटमा २०६५ पुस १५ देखि २०६६ पुस १४ को बीचमा जन्मिएकामध्येबाट खेलाडी छनोट हुनेछन् ।
बालबालिकालाई ८ वर्षको उमेरदेखि नै फुटबलमा आकर्षित गर्न एन्फाको कार्यक्रम अनुसार सुर्खेतमा पनि करिव ३ वर्षअघिदेखि ग्रासरुट फुटबल प्रशिक्षण कार्यक्रम सञ्चालन भइरहेको छ ।
