२८ चैत, काठमाडौं । पछिल्लो २४ घण्टामा देशभर ३३७ जनामा कोरोना भाइरस (कोभिड–१९) संक्रमण पुष्टि भएको छ ।
३ हजार ५३२ जनाको नमुना परीक्षण गर्दा ३३७ जनामा कोरोना संक्रमण देखिएको स्वास्थ्य तथा जनसंख्या मन्त्रालयले जनाएको छ । योसँगै नेपालमा कोरोना संक्रमितको कुल संख्या २ लाख ७९ हजार ७२५ पुगेको छ । जसमध्ये गत २४ घण्टामा १५१ सहित २ लाख ७३ हजार ८८६ जना निको भएका छन् । यस्तै थप एक जनासहित कोरोना संक्रमणबाट हालसम्म ३ हजार ३९ जनाको मृत्यु भएको छ ।
शनिबार थपिएका संक्रमितमध्ये १४१ जना काठमाडौं उपत्यकाका छन् । पछिल्लो २४ घण्टामा काठमाडौंमा ११६, ललितपुरमा २० र भक्तपुरमा ५ जना संक्रमित थपिएका छन् । यस्तै चितवनमा ३३, बाँके र रुपन्देहीमा २०/२०, पर्सामा १२, मोरङमा १०, नवलपरासी पूर्वमा ९ तथा झापा, दाङ र कैलालीमा ६/६ जनामा कोरोना भाइरसको संक्रमण पुष्टि भएको छ ।
हाल देशभर सक्रिय संक्रमितको संख्या २ हजार ८ सय रहेको मन्त्रालयले जनाएको छ ।
