आफू अभिनित सर्ट मुभी ‘मन बार’ हिन्दी सर्ट मुभी ‘नामर्द’को हुबहु कपी भएको थाहा भएपछि नायिका सुरक्षा पन्तले दुःख व्यक्त गरेकी छिन् । उनले, सामाजिक संजालमा स्टाटस कोर्दै यो कुरा थाहा पाउँदा आफूलाई निकै दुःख लागेको र यस्तो कुरा थाहा भएको भए काम गरिदैनथ्यो होला भनेर उल्लेख गरेकी छिन् ।

यो पनि पढ्नुहोस नेपाली सर्ट फिल्म ‘मन बार’ हिन्दी सर्ट फिल्म ‘नामर्द’को कपी

उनले लेखेकी छिन्–‘कुनै आइडिया मन परेर काम गरिन्छ । अनी यस्तो गलत हर्कतले गर्दा आफ्नो कामप्रति कहिलेकाही मन खुम्चिन पुग्छ । व्यक्तिगत रुपमा आइडिया हुबहु कपी गर्ने कुराको म घोर विरोधी हुँ । त्यसैले अनविज्ञ भई यस माहोलको एउटा पात्र हुन पुगेकोमा खेद प्रकट गर्दछु ।’

उनले इन्टरनेटका सम्पूर्ण कन्टेन्ट हेर्न नसकिने भन्दै यस्तो फेरि नहोला भन्न नसक्ने पनि उल्लेख गरेकी छिन् । सुरक्षाले लेखेकी छिन्–‘सायद, काम गर्नु अघि कलाकार वा अन्य टिमले बिषय कपी हो या होइन भन्ने प्रश्न लेखकको सम्मानमा ठेस नपुर्याई कसरी राख्न सक्ला ? सोच्नुपर्ने कुरा हो यो ।’

सुरक्षाले यो सर्ट मुभीको दोश्रो पार्ट पनि बनाउने कुरा उठेको तर आफू भने यसमा काम नगर्ने मनसायमा पुगेको लेखेकी छिन् । उनले यो पाठ आफूले मात्र नभएर सम्पूर्ण टिमले नै मनन गर्न आवश्यक रहेको पनि उल्लेख गरेकी छिन् ।

उनले अन्तिममा लेखेकी छिन्–‘टिमले राम्रो काम गरेको छ भन्ने कुरा पहिले कलाकारहरुबाट नै थाहा हुन्छ भने टिमले काम राम्रो नगरेको कुरा पनि कलाकारबाटै थाहा हुने हो । यसैले, कलाकारहरु एकदमै इमान्दार हुन जरुरी छ ।’