१८ जेठ, काठमाडौं । जिनेदिन जिदानले रियल मड्रिडको प्रशिक्षकबाट राजीनामा दिएपछि स्पानिस महारथी सम्हाल्ने अर्को प्रशिक्षकको होला भनेर चर्चा चल्न थालेको छ ।
यसै सन्दर्भमा कार्लो एन्सेलोट्टीको नाम अघि आएको छ । स्पानिस अनलाइन मार्काले एन्सेलोट्टी जिदानलाई रिपलेस गर्ने क्यान्डेटको रुपमा समर्थकहरुले छानेको उल्लेख गरेको छ ।
हाल प्रिमियर लिग क्लब एभरटनको प्रशिक्षक रहेका एन्सेलोट्टीको नाम अघि रियलको प्रशिक्षकका लागि मासिमिलियानो अलेग्री र एन्टोनिओ कोन्टेको नाम पनि जोडिएको थियो । संयोगवस तीनैजना इटालियन हुन् । तर, अलेग्री युभेन्ट्सको प्रशिक्षक बनिसकेका छन् ।
यस बाहेक फ्रेन्च क्लब पेरिस सेन्ट जर्मेनका प्रशिक्षक माउरिसिओ पोचेटिनो, रियलकै कास्टिलाका प्रशिक्षक तथा पूर्वखेलाडी राहुल र रियल सोसिडाड बी का प्रशिक्षक तथा रियलका पूर्वखेलाडी जाबी अलोन्सोको नाम पनि जोडिएको छ।
एल लार्गुएरोका अनुसार एन्सेलोट्टीको रियलको पहिलो विकल्पको रुपमा रहेको र क्लबका अध्यक्ष फ्लोरेन्टिनो पेरेजले सुरुआती सम्पर्कसमेत गरेको जनाएका छन्।
एसी मिलानका पूर्वप्रशिक्षकसमेत रहेका एन्सेलोट्टीले यसअघि सन् २०१३ देखि २०१५ सम्म रियल मड्रिड हेरेका थिए । सन् २०१४ मा च्याम्पियन्स लिगसमेत जितेका थिए । यस्त उनले रियलमा कोपा डेल रे, स्पानिस सुपर कप र क्लब विश्वकपसमेत जितेका छन् ।
