९ असार, काठमाडौं । जापानको टोकियोमा हुन गइरहेको ओलम्पिकमा मदिरा प्रयोगमा प्रतिबन्ध लाग्ने भएको छ ।
टोकियो-२०२० की अध्यक्ष साइको हाशिमोटोले बुधबार यस्तो घोषणा गरेकी हुन् । उनले प्रतियोगिताको क्रममा सुरक्षालाई ध्यानमा राख्दै यस किसिमको निर्णय गरिएको बताएकी छिन् ।
अब ओलम्पिक सुरु हुन केवल ३० दिन बाँकी छ र आयोजकको सम्पूर्ण ध्यान सुरक्षितरुपमा प्रतियोगिता गराउनुमा केन्द्रित देखिएको छ । आयोजकले स्टेडियमबाहिर मदिरा खरिद गरे पनि त्यसलाई भित्र लैजान नपाउने बताएको छ ।
यसअघि जापानका केही वरिष्ठ स्वास्थ्य अधिकारीहरुले मादक पदार्थको बिक्री र त्यसको प्रयोगले भौतिक दूरीको नियम पालना हुने सम्भावना कम हुने बताएका थिए । यसलाई मध्यनजर गर्दै जापानको टोकियोको अधिकांश स्थानमा मदिराको व्यापारमा रोक लगाउनुपर्ने बताइएको थियो ।
टोकियो ओलम्पिकका आयोजकले सोमबार करिब १० हजार घरेलु दर्शकलाई स्टेडियममा खेल हेर्ने अनुमति दिइने बताएको थियो । यद्यपि विदेशी दर्शकमाथि भने प्रतिबन्ध लगाइनेछ ।
एजेन्सीहरुको सहयोगमा
