२४ असार, काठमाडौं । अन्तर्राष्ट्रिय क्रिकेट परिषद् (आइसीसी)ले आगामी असोजमा हुने चौथो संस्करणको एभरेष्ट प्रिमियर लिग (इपीएल) क्रिकेटलाई मान्यता दिएको छ ।
आयोजक इपीएल प्रालिले विहीबार विज्ञप्ति जारी गर्दै इपीएललाई आइसीसीले मान्यता दिएको जनाएको छ ।
इपीएलको चौथो संस्करण असोज ९ देखि २३ गतेसम्म काठमाडौंमा सञ्चालन हुँदैछ । गतवर्ष चैत १ गतेदेखि १५ गतेसम्म मैदानमा हुने तय भएपनि कोरोना महामारीका कारण प्रतियोगिता स्थगित भएको थियो ।
नेपाल क्रिकेट संघ (क्यान)ले यसअघि नै इपीएल आयोजनाका लागि अनुमति दिइसकेकोछ ।
आइसीसीको मान्यता पाएपछि विदेशी खेलाडीको लागि पनि इपीएल खेल्ने बाटो खुलेको छ । यसअघि क्रिस गेल जस्ता टी२० का स्टार नेपाल आउने पक्का भएको थियो । तर तोकिएकै समयमा लिग नहुँदा नेपाली दर्शकले टीयू मैदानमा गेलको खेल हेर्न पाएनन् ।
यसअघि सन् २०१९ मा तेस्रो संस्करण आयोजना भएको थियो । जसमा ललितपुर प्याट्रिओट्सले उपाधि जितेको थियो ।
इपीएलमा साविक विजेता ललितपुरसँगै काठमाडौं किङ्स ११, विराटनगर वारियर्स, पोखरा राइनोज, चितवन टाइगर्स र भैरहवा ग्ल्याडियटर्सले प्रतिस्पर्धा गर्नेछन् ।
