कामाभिंगा रियलमा अनुबन्धित

२०७८ भदौ १६ गते ६:३७

१६ भदौ, काठमाडौं । स्पानिस क्लब रियल मड्रिडले युवा स्टार खेलाडी एडुअर्डो कामाभिंगालाई अनुबन्ध गरेको छ । रियलले ट्रान्सफरको विन्डोको अन्तिम दिन १८ वर्षीय फ्रेन्च मिडफिल्डर कामाभिंगालाई अनुबन्ध गरेको हो ।

रियलले स्टेटमेन्ट जारी गर्दै उनलाई क्लबमा अनुबन्ध गरेको जनाउँदै स्वागत गरेको छ ।

रियलले कामाभिंगालाई फ्रेन्च लिग वान क्लब रेन्सबाट ३० मिलियन युरोमा भित्र्याएको मार्काले उल्लेख गरेको छ ।

अर्का फ्रेन्च स्टार किलियन एमबाप्पेलाई भित्र्याउने प्रयास गरेपनि सफल नभएपछि रियलले युवा खेलाडी कामाभिंगालाई ल्याएको हो ।

१८ वर्षीय कामाभिंगाले फ्रान्सको राष्ट्रिय टिमबाट खेलिसकेका छन् ।

रियलले उनीसंग सन् २०२७ सम्मको लागि सम्झौता गरेको छ ।

कामाभिंगाको आगमनले रियलको मिडफिल्डमा थप सहयोग पुग्ने पक्का छन् ।प्रशिक्षक कार्लो एन्सेलोट्टीले पनि यस एरियामा बलियो पार्न खोजिरहेका थिए ।

कामाभिंगाको रेन्ससँगको सम्झौता २०२० जुनमा सकिने थियो र फ्री एजेन्ट हुने थिए । तर रियलले एक वर्षअघि नै उनलाई क्लब भित्र्याएको हो ।

एडुअर्डो कामाभिंगा