विदेश जान घडेरी धितो राखेका युवा एजेन्टबाट ठगिए

२८ भदौ, जनकपुरधाम । महोत्तरीको गौशाला नगरपालिका–३ का सुरेन्द्र महरा गाउँमै दैनिक ज्यालादारीको काम गर्थे । यसबाट भएको आम्दानीले जीविका चलाउन गाह्रो भएपछि विदेश जाने सोचाइ बनाए ।

त्यही क्रममा २०७४ सालमा उनको भेट भयो सर्लाहीको धनकौल गाउँपालिकाका राजन भनिने कुन्दन मिश्रसँग । मिश्रले दुबईमा राम्रो काम लगाइदिने विश्वास दिलाए । महराले घडेरी धितो राखेर गत फागुनमा गाउँकै साहूसँग १ लाख ५० हजार रुपैयाँ ऋण लिए । त्यसमध्ये १ लाख ३० हजार रुपैयाँ मिश्रलाई दिए ।

महराका अनुसार उनीजस्तै अनिलकुमार महतो, सुनिलकुमार महतो, रामकिशोर मुखियासहित ११ जनाले मिश्रलाई १ लाख ३० हजार रुपैयाँका दरले रकम बुझाएका छन् । तर उनीहरु कोही पनि विदेश जान पाएका छैनन् ।

‘लिएको ऋणको व्याज दिनदिनै बढ्दै गएको छ’ महरा भन्छन्, ‘विदेश गएर श्रम गर्न पाएको भए चुक्ता गर्न सजिलो हुन्थ्यो । अब कसरी चुक्ता गर्ने ?’

महोत्तरी गौशालाकै सुनिलकुमार महतोले पनि २ लाख ऋण लिएर मिश्रलाई १ लाख ३० हजार रुपैयाँ बुझाएका थिए । ‘बाँकी रकम घरमा छोडेर विदेश जाने सपना थियो’ उनी भन्छन्, ‘तर, ती सबै सपना चकनाचुर पारिदिए ।’

ऋण लिएर मिश्रलाई रकम बुझाएलगत्तै लकडाउन शुरु भएको र त्यसपछि आफूहरुले कामसमेत नपाउँदा पेट पाल्नै समस्या भएको उनीहरु बताउँछन् ।

काठमाडौं बोलाएर अलपत्र पारे

एजेन्ट मिश्रले भिसासमेत आइसकेको भन्दै २०७४ फागुनमा पासपोर्ट र पैसा लिएर काठमाडौं बोलाए । २४ फागुनमा महोत्तरीको गौशाला नगरपालिका–३ र औरही नगरपालिका–६ का ११ जना काठमाडौं गए । मिश्रले काठमाडौंको गौशाला बोलाएर उनीहरुसँग रकम लिए । पीडितले रकम दिएको भिडियोसमेत खिचेका छन् ।

पैसा लिएर अब तिमीहरुलाई उडाइदिन्छु भन्दै आफूहरुलाई गौशालामै छाडेर मिश्र गएको पीडित अनिल महतोले बताए । ‘आज आउँछु, भोलि आउँछु भन्दै मिश्र १२ दिनसम्म आएनन्’ महतो भन्छन्, ‘त्यसपछि हामीले गौशाला प्रहरी वृत्तमा उनीविरुद्व उजुरी पनि दियौं । तर, प्रहरीले केही गरिदिएन । बाध्य भएर गाउँ फर्कियौं ।’

महतोका अनुसार मिश्रले एसआर मेनपावर काठमाडौंबाट प्रति महिना १ लाख ८० हजार रुपैयाँ तलव पाउने गरी दुवई पठाइदिने आश्वासन दिएका थिए ।

रकम लिएर लामो समयसम्म विदेश नपठाइदिएपछि र रकम समेत फिर्ता नगरेपछि पीडितहरुले गौशाला नगरपालिकास्थित स्वरोजगार कार्यालय र इलाका प्रहरी कार्यालय गौशालामा मिश्रविरुद्व उजुरी दिएका छन् ।

उजुरी दिएपछि फोन गरेर मिश्रले धम्की दिएको महतोले बताए । ‘अब त एक पैसा पाउँदैनस्, उजुरीले मेरो केही बिगार्दैन’ भनेको महतोले सुनाए ।