ब्राजिलमा विमान दुर्घटनामा परी गायिका मेन्डोन्सासहित ५ जनाको मृत्यु

२० कात्तिक, काठमाडौं । ब्राजिलमा एक निजी विमान दुर्घटना हुँदा त्यसमा सवार एक गायिकासहित पाँच जनाको मृत्यु भएको छ । ब्राजिलको दक्षिणपूर्वी मिनास गेरैस राज्यको ग्रामीण क्षेत्रमा उक्त विमान दुर्घटना भएको हो ।

दुर्घटनामा ब्राजिलकी चर्चित गायिका मारिलिया मेन्डोन्सासहित उनका काका, निर्माता र दुई जना प्राविधिकको मृत्यु भएको अन्तर्राष्ट्रिय सञ्चारमाध्यमहरुले जनाएका छन् ।

गायिका मेन्न्डोन्सा आफ्ना क्रु मेम्बरसहित काराटिन्गा शहरमा जाने क्रममा शुक्रबार साँझ उक्त विमान दुर्घटनामा परेको बताइएको छ ।  दुर्घटनास्थल उक्त शहरभन्दा १२ किलोमिटर टाढा पर्छ ।

मेन्डोन्सा सन् २०१९ की ग्रामी अवार्ड विजेता समेत हुन् ।

एजेन्सीबाट