९ पुस, काठमाडौं । नेपाली कांग्रेसका नेता डा. प्रकाशशरण महतले महामन्त्रीमा आफ्नो हार अनपेक्षित भएको बताएका छन् । यद्यपि यसलाई स्वीकार गर्ने र कसैप्रति दोषारोपण नगर्ने उनले बताए ।
शुक्रबार पत्रकारहरूसँग भएको भेटघाटमा निर्वतमान सहमहामन्त्रीसमेत रहेका महतले भने, ‘मैले सहयोग पाइनँ, यो अनेपेक्षित परिणाम आएको अरूलाई पनि लागेको छ । तर कसैलाई दोषारोपण गर्दिनँ, मेरै कमजोरी रह्यो होला ।’
कांग्रेस महामन्त्रीमा गगनकुमार थापा र विश्वप्रकाश शर्मा निर्वाचित हुँदा महत तेस्रो स्थानमा रहेका थिए । महामन्त्रीमा मात्र अनपेक्षित नतिजा आएको भन्दै महतले त्यसको समीक्षा हुने बताए ।
तर, पराजय भएपनि थप उर्जाका साथ देश र जनताको काम गर्ने उनले बताएका छन् । उनले भने, ‘म काम गर्ने मान्छे हुँ, काममा विश्वास गर्छु । भोलिका दिनमा अझ उत्साहका साथ काम गर्छु । पराजयले मलाई समयको सुविधा दिएको छ । यसको उपयोग गर्नेछु ।’
प्रतिक्रिया 4