दसैंमा घुमघाम : कम खर्चमा घुम्न सकिने ७ देश

दसैं नजिकिँदै जाँदा शहरबाट गाउँ फर्किने टिकटको खोजी मात्रै सुरु हुँदैन, परिवारसँगै केही दिन घुम्ने योजना पनि बन्न थाल्छ । व्यस्त दैनिकीलाई थाती राखेर घुम्ने रहर पूरा गर्न दशैंको लामो बिदा धेरैका लागि राम्रो अवसर बन्छ ।

कसैलाई परिवारसँग समुद्रको छालसँगै केही दिन बिताउनु छ, कसैलाई नयाँ शहरका गल्लीमा घुम्दै स्थानीय खाना चाख्नु छ । कसैलाई बालबालिकासँग रमाइलो गर्न मन छ भने कसैलाई परिवारका ज्येष्ठ सदस्यलाई नयाँ ठाउँ देखाउने रहर ।

त्यसैले, दसैंको बिदामा स्वदेशका गन्तव्यसँगै विदेश यात्राको योजना बनाउने नेपाली पनि भेटिन्छन् ।

यसपटक दसैंको बिदामा न्यूनतम बजेटमा परिवार वा साथीभाइसँग थाइल्यान्डको फुकेट, इन्डोनेसियाको बाली, मलेसिया हुँदै सिंगापुर, भियतनामको हनोई, चीनको ग्रेटवाल, माल्दिभ्स र अजरबैजानको बाकु एउटा विकल्प हुन सक्छ ।

१. थाइल्यान्डको फुकेट

परिवारसँग समुद्रको आनन्द लिन चाहने हो भने थाइल्यान्डको फुकेट यात्राको राम्रो सुरुवात हुन सक्छ । फुकेट पुगेको पहिलो दिन नै समुद्रको नीलो पानी र सेतो बालुवासँग साक्षात्कार गर्न पाइन्छ ।

पाटोङ बिच आसपास घुम्दै समुद्रकिनारमा केही समय बिताउन सकिन्छ । साँझ पर्दै जाँदा समुद्रमा अस्ताउँदै गरेको सूर्य हेर्नु र त्यसपछि स्थानीय बजारतिर निस्कनुको आफ्नै मज्जा छ ।

फुकेटको खास रोमाञ्चकता भने टापु घुम्दा सुरु हुन्छ । समय मिल्यो भने परिवारसँग फि-फि आइल्यान्ड वा जेम्स बोन्ड आइल्यान्डको एकदिने यात्रा गर्न सकिन्छ । स्पिडबोटमा समुद्रको छालसँगै दौडिँदै नीलो पानीको बीचतिर रहेका टापुतिर पुग्नु आफैंमा अविस्मरणीय अनुभव हुन्छ ।

कतिपय भ्रमण प्याकेजमा डुंगा यात्रा, टापु भ्रमणसँगै पौडी, स्नोर्कलिङ वा समुद्रमा रमाउने अन्य गतिविधि पनि समेटिएका हुन्छन् ।

समुद्रबाट फर्किएपछि साँझ फुकेट ओल्ड टाउनतिर पुग्दा यात्राको स्वाद फेरिन्छ । रंगीचंगी पुराना भवन, साना पसल र गल्लीमा हिँड्दै स्थानीय जीवनशैली नियाल्न सकिन्छ । साँझपछि पाटोङको बाङ्ला रोडतिर भने फुकेटको रात्रिकालीन जीवनको अर्कै रंग देखिन्छ । उज्याला बत्ती, संगीत, बार र रेस्टुरेन्टले रात अबेरसम्म चहलपहल बनाइरहेका हुन्छन् ।

सडकछेउका पसलमा पाकिरहेका परिकारको बास्नासँगै घुम्दा खानाका पारखीका लागि पनि फुकेटको यात्रा उत्तिकै रमाइलो हुन्छ । प्याड थाई, टम यमजस्ता लोकप्रिय थाई परिकारसँगै होक्कियन नुडल्स, ओ–ताओ, लो–बा र अपोङजस्ता स्थानीय स्वाद चाख्न सकिन्छ ।

यसरी फुकेटमा बिहान समुद्र, दिउँसो टापु र पानीको रोमाञ्च, साँझ पुरानो सहरको गल्ली र रातमा पाटोङको चहलपहल, एउटै यात्रामा फरक–फरक अनुभव लिन सकिन्छ ।

के छ भिसा प्रक्रिया ?

नेपालबाट थाइल्यान्ड जान सामान्य नेपाली राहदानीवाहकले पर्यटक भिसाको प्रक्रिया पूरा गर्नुपर्छ । पर्यटक भिसाका लागि कम्तीमा ६ महिना समय बाँकी रहेको राहदानी, बसाइको प्रमाण, यात्राको विवरण, हवाई टिकट र आर्थिक क्षमताको प्रमाण आवश्यक पर्छ । आवेदन अनलाइन ई–भिसा प्रणालीमार्फत गर्नुपर्ने व्यवस्था छ ।

२. इन्डोनेसियाको बाली

बालीको नाम आउँदा धेरैले समुद्रको छाल सम्झिन्छन् । तर बालीको खास आकर्षण समुद्रसँगै हरिया धानका फाँट, पुराना मन्दिर र सूर्यास्तको मनमोहक दृश्य-इन्डोनेसियाको बालीमा एउटै यात्रामा यी सबै अनुभव गर्न सकिन्छ । समुद्रकै लागि चर्चित भए पनि बालीको खास पहिचान यहाँको संस्कृति र परम्परागत जीवनशैली हो ।

बाली पुगेपछि उबुदबाट यात्रा सुरु गर्न सकिन्छ । धानका सिँढीजस्ता हरिया फाँट, कला बजार र स्थानीय बस्ती हुँदै हिँड्दा बालीको फरक रूप देखिन्छ । समय मिल्यो भने तेगालालाङका धानबारी हेर्न सकिन्छ । यहाँबाट मन्दिर र स्थानीय बजारतिरको यात्रा अघि बढाउन सकिन्छ ।

समुद्रमा रमाउन चाहनेका लागि कुटा, सेमिन्याक वा नुसा दुआतिर जान सकिन्छ । उलुवातु मन्दिर पुगेर समुद्रतर्फ फैलिएको चट्टानी किनारमा अस्ताउँदै गरेको सूर्य हेर्नु बाली यात्राको विशेष क्षण बन्न सक्छ । साँझ त्यही क्षेत्रमा केकाक नृत्य हेर्न पाए यात्रा अझ रोचक हुन्छ । रामायणको कथामा आधारित यो परम्परागत प्रस्तुति बालीको सांस्कृतिक पहिचानसँग जोडिएको छ ।

समय भए डुंगाबाट नुसा पेनिडाको एकदिने यात्रा गर्न सकिन्छ । चट्टानी समुद्री किनार, नीलो पानी र पहाडी दृश्यले यो यात्रालाई छुट्टै बनाउँछन् । बाली पुगेर खानाको स्वाद नलिई फर्किनु पनि अधुरोजस्तो हुन्छ । बबी गुलिङ, साटे लिलित, नासी चाम्पुरसँगै नासी गोरेङ र मी गोरेङजस्ता इन्डोनेसियाली परिकार चाख्न सकिन्छ ।

यसरी बालीमा बिहान हरियाली र संस्कृति, दिउँसो समुद्र र टापुको रोमाञ्च अनि साँझ सूर्यास्त, नृत्य र स्थानीय खानाको स्वादसँग दिन बिताउन सकिन्छ ।

भिसा प्रक्रिया के छ ?

नेपालीका लागि लागू हुने इन्डोनेसियाको पर्यटक भिसा व्यवस्था यात्रा अघि आधिकारिक अध्यागमन प्रणालीबाट जाँच गर्नुपर्छ ।

३. मलेसिया हुँदै सिंगापुर

कम समयमा दुई देशको अनुभव लिन चाहनेका लागि क्वालालम्पुर–सिंगापुर यात्रा आकर्षक हुन सक्छ । क्वालालम्पुरमा पेट्रोनास ट्विन टावर हेरेर बातु गुफा र बुकित बिन्ताङ घुम्न सकिन्छ । साँझ बुकित बिन्ताङको चहलपहलसँगै स्थानीय बजार र खानाका परिकारको स्वाद लिन सकिन्छ । त्यसपछि क्वालालम्पुरबाट बस चढेर सिंगापुरतर्फ लाग्न सकिन्छ । स्थलमार्गबाट दुई देशको यात्रा गर्दा बाटोमा देखिने बदलिँदो दृश्यले यात्रालाई अझ रोचक बनाउँछ ।

सिंगापुर पुगेपछि मरिना बे, मर्लायन पार्क, गार्डेन्स बाइ द बे र सेन्टोसा घुम्न सकिन्छ । सहरभित्र एमआरटी प्रयोग गर्दा धेरै ठाउँ सजिलै पुग्न सकिन्छ । घुमघामसँगै किनमेल गर्न चाहनेका लागि भने सिंगापुरका बजार र किनमेल केन्द्र अर्को आकर्षण हुन् ।

अर्चर्ड रोड विश्वप्रसिद्ध किनमेल क्षेत्र हो, जहाँ अन्तर्राष्ट्रिय ब्रान्डदेखि विभिन्न प्रकारका कपडा, जुत्ता, सौन्दर्य सामग्री र विद्युतीय सामानसम्म किन्न सकिन्छ । बजेटमा किनमेल गर्न चाहनेले चाइनाटाउन, बुगिस र लिटिल इन्डियातिरका पसल पनि घुम्न सक्छन् ।

खानामा मलेसियाको नासी लेमक र रोटी चनाई तथा सिंगापुरको हाइनानीज चिकेन राइस र लक्साजस्ता परिकार चाख्न सकिन्छ । यसरी एउटै यात्रामा मलेसियाको संस्कृति, सहर र खानादेखि सिंगापुरको आधुनिकता, किनमेल र स्वादसम्म अनुभव गर्न सकिन्छ ।

भिसा प्रक्रिया के छ ?

नेपाली राहदानीबाहकका लागि मलेसिया र सिंगापुर दुवैको भिसा आवश्यक हुन्छ । सिंगापुर प्रवेशअघि एसजी अराइभल कार्ड पनि बुझाउनुपर्छ ।

४. भियतनामको हनोई

हनोईमा घुम्नका लागि ठूलो खर्च गर्नैपर्छ भन्ने छैन । बिहान होआन किम तालबाट यात्रा सुरु गर्न सकिन्छ । त्यसपछि पुरानो बजार क्षेत्रका गल्लीमा पस्दै स्थानीय जीवन हेर्न सकिन्छ । दिउँसो हो ची मिन्ह समाधिस्थल, एक स्तम्भ भएको प्यागोडा र टेम्पल अफ लिटरेचर पुग्न सकिन्छ । साँझ फेरि पुरानो बजारतिर फर्केर सडक खानाको स्वाद लिन सकिन्छ ।

फो, बुन चा, बान मी र एग कफी हनोईमा चाख्नैपर्ने स्थानीय स्वाद हुन् ।

हनोईमै सीमित नभई समय छ भने हनोई–निन बिन्ह–हा लङ बे जोडेर यात्रा गर्न सकिन्छ । हा लङ बेमा डुंगा चढेर चुनढुंगाका विशाल चट्टानबीच घुम्ने अनुभव यात्राको मुख्य आकर्षण बन्न सक्छ ।

भिसा प्रक्रिया के छ ?

भियतनामको विद्युतीय भिसा बढीमा ९० दिनसम्मका लागि एकपटक वा पटक–पटक प्रवेश गर्न मिल्ने गरी लिन सकिन्छ ।

५. चीनको ग्रेटवाल

हामीलाई घुम्नका लागि चीनको ग्रेटवाल निकै आकर्षक गन्तव्य हो । यहाँ जाने हो भने बेइजिङलाई आधार बनाएर यात्रा बनाउन सकिन्छ । एक दिन ग्रेटवालका लागि छुट्याउन सकिन्छ । बिहानै निस्केर ग्रेटवालको मुतियान्यु वा बादालिङ खण्ड पुग्न सकिन्छ ।

ग्रेटवाल घुमेर फर्किएपछि अर्को दिन निषिद्ध शहर र तियानआनमेन क्षेत्र हेर्न सकिन्छ । बेइजिङको स्थानीय जीवन बुझ्न बजार र पुराना गल्लीमा पनि डुल्न सकिन्छ ।

यहाँ पुगेपछि यहाँको चर्चित पेकिङ डक, जियाओजी र विभिन्न चिनियाँ नुडल्स चाख्न सकिन्छ ।

भिसा प्रक्रिया के छ ?

नेपाली साधारण राहदानीमा पर्यटक भिसा लिन पाइन्छ ।

६. माल्दिभ्स

निलो समुद्र, सेतो बालुवा र पानीमुनिको रंगीन संसारमा रमाउन चाहनेका लागि माल्दिभ्सको यात्रा फरक अनुभव बन्न सक्छ । महँगो निजी रिसोर्टमै बस्नुपर्छ भन्ने छैन । बजेट मिलाउन स्थानीय टापुमा रहेका होटल वा गेस्टहाउस रोज्न सकिन्छ । माले पुगेपछि स्थानीय डुंगा वा स्पिडबोटबाट बस्ने टापुतर्फ जान सकिन्छ ।

माल्दिभ्स पुगेपछि छुटाउन नहुने अनुभव भनेको समुद्रभित्रको संसार नियाल्नु हो । सफा निलो पानीमा स्नोर्कलिङ गर्दै रंगीचंगी कोरल रिफ, विभिन्न प्रजातिका माछा र समुद्री जीव नजिकबाट हेर्न सकिन्छ । समय र बजेट मिल्यो भने डुंगाबाट अर्को टापु घुम्ने, डल्फिन हेर्ने वा सूर्यास्त यात्रामा निस्कने अनुभव पनि लिन सकिन्छ । समुद्रकिनारमा बसेर केही घण्टा आराम गर्नु, पौडी खेल्नु वा साँझ सूर्यास्त हेर्नु पनि माल्दिभ्स यात्राको आफ्नै आनन्द हो ।

स्थानीय टापु रोज्दा रिसोर्टको चमकभन्दा बाहिर माल्दिभ्सको सामान्य जनजीवन पनि नजिकबाट बुझ्न पाइन्छ । स्थानीय बजार र बस्ती घुम्दै यहाँको खानाको स्वाद लिन सकिन्छ । मास हुनी, गरुडिया, फिहुनु मास र विभिन्न माछाका परिकार चाख्न सकिन्छ ।

यसरी माल्दिभ्समा दिन समुद्र र पानीमुनिको संसारसँग बिताउन सकिन्छ भने साँझ सूर्यास्त र टापुको शान्त वातावरणमा रमाउन सकिन्छ । परिवारसँग केही दिन भीडभाडबाट टाढा भएर आराम गर्न चाहनेका लागि यो यात्रा सम्झनलायक बन्न सक्छ ।

भिसा प्रक्रिया के छ ?

यहाँ आउन पर्यटक भिसा आगमनमै दिइन्छ । फर्किने टिकट र होटल बुकिङजस्ता कागजात चाहिन सक्छन् । यात्रा अघि अनलाइन ट्राभलर डिक्लेरेसन पनि बुझाउनुपर्छ ।

७. अजरबैजानको बाकु

अलि फरक देश र फरक संस्कृतिको अनुभव लिन चाहनेका लागि अजरबैजानको राजधानी बाकु आकर्षक गन्तव्य बन्न सक्छ । क्यास्पियन सागरको किनारमा रहेको यो सहरमा एकातिर सयौँ वर्ष पुरानो इतिहास भेटिन्छ भने अर्कोतिर आधुनिक वास्तुकलाले नयाँ रूप देखाउँछ ।

बाकु पुगेपछि इचेरिशेहर अर्थात् पुरानो सहरबाट यात्रा सुरु गर्न सकिन्छ । ढुंगाले बनेका साँघुरा गल्ली, ऐतिहासिक भवन, पसल र स्थानीय जीवनशैली नियाल्दै घुम्न सकिन्छ । यहाँको शिरभानशाह दरबार र मेडेन टावर पनि हेर्न सकिन्छ । त्यसपछि फ्लेम टावरतिर पुगेर बाकु सहरको दृश्य नियाल्न सकिन्छ ।

साँझ क्यास्पियन सागर किनारको बाकु बुलेभार्डमा हिँड्दै समुद्री हावा र सहरको उज्यालोको आनन्द लिन सकिन्छ । अर्को दिन आधुनिक वास्तुकलाका लागि चर्चित हेयदर अलियेभ सेन्टर पुग्न सकिन्छ ।

बाकुको यात्रा खानाको स्वादबिना पनि अधुरो हुन्छ । अजरबैजानी प्लोभ, डोल्मा, कुताब र कबाबजस्ता परिकार स्थानीय रेस्टुरेन्टमा चाख्न सकिन्छ । पुरानो सहरको इतिहासदेखि आधुनिक सहरको चमक र क्यास्पियन सागरको किनारसम्म—बाकुमा एउटै यात्रामा फरक–फरक अनुभव लिन सकिन्छ ।

भिसा प्रक्रिया के छ ?

अजरबैजानको विद्युतीय भिसा प्रणालीबाट यात्रुले आवेदन दिन सक्छन् । नेपाली राहदानीको योग्यता र पछिल्लो प्रवेश सर्त आवेदनअघि जाँच गर्नुपर्छ।

एजेन्सीको प्याकेज लिने कि आफैं टिकट काटेर जाने ?

पहिलोपटक विदेश जाने, परिवारसँग जाने वा समय कम भएका यात्रुका लागि प्याकेज सजिलो हुन सक्छ । टिकट, होटल, विमानस्थलबाट ल्याउने–पुर्‍याउने र घुमाउने व्यवस्था एउटै योजनामा हुँदा धेरै झन्झट कम हुन्छ ।

तर प्याकेजको मूल्य हेर्दा के–के समावेश छ भनेर अवश्य हेर्नुपर्छ । हवाई टिकट, होटल, खाना, भिसा, प्रवेश शुल्क, गाइड, स्थानीय यातायात र बिमा सबै समावेश छन् कि छैनन् छुट्याउनुपर्छ ।

अर्कोतर्फ साथीभाइको समूहमा जाने र सार्वजनिक यातायात प्रयोग गर्न सक्ने हो भने आफैं योजना बनाउँदा खर्च घटाउन सकिन्छ । मलेसियाबाट सिंगापुर बसमा जाने, सिंगापुरमा एमआरटी प्रयोग गर्ने वा माल्दिभ्समा स्थानीय टापुको होटल रोज्ने जस्ता विकल्पले बजेट नियन्त्रण गर्न मद्दत गर्छन् ।