यती एयरलाइन्सले पूरा गर्‍यो २८ वर्ष, एक वर्षमा ९ लाख यात्रुलाई सेवा

५ असोज, काठमाडौं । नेपालको हवाई यातायात क्षेत्रमा यती एअरलाइन्सले २८ वर्ष पूरा गरेको छ। सन् १९९८ मा व्यावसायिक उडान सुरु गरेको यतीले पछिल्लो एक वर्षमा ९ लाख यात्रुलाई सेवा दिएको जनाएको छ।

कम्पनीका अनुसार २८ वर्षको यात्रामा सेवा विस्तारसँगै यात्रुको विश्वास, उड्डयन सुरक्षा र समग्र यात्रु अनुभवलाई व्यवसायको महत्वपूर्ण आधार बनाउँदै आएको छ। पछिल्लो एक वर्षमा ९ लाख यात्रुलाई सेवा दिन सक्नुलाई कम्पनीले नेपाली यात्रुमाझ कायम रहेको विश्वासको सूचकका रूपमा लिएको छ।

नेपालको आन्तरिक हवाई बजार सञ्चालन लागत, विमानस्थल पूर्वाधार, मौसमजन्य अवरोध तथा सडक यातायातसँगको प्रतिस्पर्धालगायत चुनौतीबीच अघि बढिरहेको छ। यस्तो अवस्थामा ठूलो संख्यामा यात्रुलाई सेवा दिन सक्नु महत्वपूर्ण उपलब्धि भएको कम्पनीको भनाइ छ।

यात्रु संख्या व्यवसायको महत्वपूर्ण सूचक भए पनि आफ्नो उपलब्धिलाई त्यसमा मात्र सीमित नगरेको यतीले जनाएको छ। यात्रु अनुभव, सेवा विश्वसनीयता, सञ्चालन दक्षता र दीर्घकालीन ग्राहक सम्बन्धलाई पनि कम्पनीले प्राथमिकतामा राख्दै आएको छ।

यात्रु अनुभव सुधारमा जोड

वायुसेवा क्षेत्रमा प्रतिस्पर्धा बढ्दै जाँदा भाडादरसँगै टिकट बुकिङको सहजता, विमानस्थल सेवा, सूचना प्रवाह, कर्मचारीको व्यवहार, समय व्यवस्थापन तथा समग्र यात्रु अनुभव महत्वपूर्ण बन्दै गएको कम्पनीले जनाएको छ।

यही विषयलाई ध्यानमा राख्दै यतीले टिकट बुकिङदेखि विमानस्थल सेवा र उडान अनुभवसम्मका प्रक्रियालाई थप सहज र प्रभावकारी बनाउने प्रयास गरिरहेको जनाएको छ। यात्रुको सुझाव तथा प्रतिक्रियालाई सेवा सुधारको आधार बनाउँदै डिजिटल माध्यम र ग्राहक सम्पर्क प्रणालीलाई समेत प्रभावकारी बनाउनेतर्फ कम्पनी केन्द्रित रहेको बताएको छ।

उड्डयन सुरक्षा प्राथमिकतामा

यतीले उड्डयन सुरक्षालाई आफ्नो व्यवसायको मुख्य आधारका रूपमा राख्दै आएको जनाएको छ। सञ्चालन प्रक्रिया, नियमित प्राविधिक निगरानी, चालक दल तथा प्राविधिक जनशक्तिको तालिम र सुरक्षा व्यवस्थापन प्रणालीमा निरन्तर सुधार गर्दै आएको कम्पनीको भनाइ छ।

सुरक्षित उडानसँगै यात्रुलाई भरपर्दो र सहज सेवा प्रदान गर्नु दीर्घकालीन प्रतिबद्धता रहेको यतीले जनाएको छ।

पर्यटन र आर्थिक गतिविधिमा योगदान

नेपालको भौगोलिक अवस्थाका कारण हवाई यातायात पर्यटन, व्यापार, स्वास्थ्य, शिक्षा तथा आन्तरिक आवागमनको महत्वपूर्ण माध्यम रहँदै आएको छ। यतीले विभिन्न प्रमुख सहर तथा पर्यटकीय गन्तव्यलाई हवाई सेवामार्फत जोड्दै आएको जनाएको छ।

हवाई सेवाको पहुँचले यात्रुको समय बचत गर्नुका साथै पर्यटन तथा स्थानीय व्यवसायलाई समेत सहयोग पुर्‍याउने भएकाले वायुसेवा व्यवसायलाई समग्र अर्थतन्त्रसँग जोडेर हेर्नुपर्ने कम्पनीको धारणा छ।

आगामी दिनमा सेवा सुधारलाई निरन्तरता

२८औँ वार्षिकोत्सवलाई विगतका उपलब्धि स्मरण गर्ने अवसरसँगै आगामी यात्राको दिशा तय गर्ने अवसरका रूपमा लिएको यतीले जनाएको छ।

यात्रुको मागअनुसार सेवा सुधार, सञ्चालन दक्षता अभिवृद्धि, डिजिटल प्रविधिको प्रयोग तथा ग्राहक अनुभवलाई थप सहज बनाउने विषयलाई आगामी प्राथमिकतामा राखिएको कम्पनीले जनाएको छ।

२८ वर्षको अनुभव र लाखौँ यात्रुको विश्वासलाई आधार बनाउँदै सुरक्षित, भरपर्दो, सहज तथा यात्रुमैत्री हवाई सेवामार्फत आगामी यात्रा अघि बढाउने प्रतिबद्धता यतीले जनाएको छ।