थाइल्याण्ड ओपन बक्सिङमा सुष्मा पराजित

२१ चैत, काठमाडौं । थाइल्याण्डको फुकेटमा सञ्चालन भइरहेको थाइल्याण्ड ओपन इन्टरनेशनल बक्सिङ च्याम्पियनसिप २०२२ मा नेपालकी सुष्मा तामाङ प्रतिस्पर्धात्मक खेलमा पराजित भएकी छन् ।

सोमबार भएको महिला ४८ केजी तौल समूहमा इटलीकी रोबेर्टा बेनाट्टीसँग ३–२ को स्पिलिट डिसिजनको आधारमा पराजित भइन् । तीन राउण्डमा पछि परेकी सुष्माले दुई राउण्ड आफ्नो पक्षमा पारेपनि समग्र ३–२ अंकको आधारमा पराजित भइन् ।

त्यस्तै महिला ५७ केजी नेपालकी खेलाडी चन्द्रकला थापा इटलीकै ओलम्पिक कांस्य पदक विजेता इर्मा टेस्टासँग ५–० अंकले पराजित भएको नेपाल बक्सिङ संघका प्रवक्ता श्यामकाजी अवालेले जनाएका छन् ।

अब मंगलबार १३ औं सागको स्वर्ण विजेता मिनु गुरुङ थाइल्यान्डकी खेलाडीविरुद्ध खेल्नेछिन् ।