लाजियोमाथि पुनरागमन जितसहित एसी मिलान शीर्ष स्थानमा उक्लियो

२०७९ वैशाख १२ गते ८:०६

लाजियोमाथि पुनरागमन जितसहित एसी मिलान शीर्ष स्थानमा उक्लियो

१२ वैशाख, काठमाडौं । सान्ड्रो टोनालीले इन्जुरी टाइममा गोल गरेपछि एसी मिलानले इटालियन सिरी ए मा लाजियोमाथि २-१ को पुनरागमन जित निकालेको छ ।

लाजियोले घरेलु मैदानमा सुरुमै अग्रता लिए पनि जोगाउन सकेन । ओलभिर जिरुड र सटोनालीको गोलमा जित हात पार्दै मिलान भने शीर्ष स्थानमा फर्किएको छ । मिलानले इन्टर मिलानलाई दुई अंकले पछि पारेको छ ।

खेलको चौथो मिनेटमा सिरो इम्मोबाइलले गोल गर्दै घरेलु मैदानमा लाजियोलाई अग्रता दिलाएका थिए । यस सिजन इम्मोबाइलको यो २६औं गोल हो ।

पहिलो हाफमा उक्त अग्रता कायम रहे पनि दोस्रो हाफमा मिलानले पुनरागमन गर्‍यो । ५०औं मिनेटमा ओलिभर जिरुडले मिलानका लागि बराबरी गोल फर्काए । त्यसपछि इन्जुरी टाइममा टोनालीले गोल गर्दै एसी मिलानलाई २-१ को जित दिलाए ।

जितपछि ३४ खेलमा ७४ अंक जोड्दै मिलान शीर्ष स्थानमा उक्लेको छ । एक खेल कम खेलेको इन्टर ७२ अंकसहित दोस्रोमा छ । लाजियो ३४ खेलबाट ५६ अंकसहित सातौं स्थानमा छ ।