बीआरआई सम्झौताको विरोधमा वीरगञ्जमा प्रदर्शन

१४ वैशाख, वीरगञ्ज । राष्ट्रिय एकता अभियानले पर्सामा बेल्ट एण्ड रोड इनिसियटिभ  (बीआरआई) सम्झौता राष्ट्रघाती भएको भन्दै प्रदर्शन गरेको छ । उनीहरुले चीनविरूद्ध नारा लगाउँदै चिनियाँ राष्ट्रपति सी चिनफिङ तस्वीर जलाएका छन् ।

अभियान निकट विधार्थीहरुले वीरगञ्जस्थित माइस्थान चोकमा प्रदर्शन गरेको हो । बीआरआई सम्झौता राष्ट्रघाती भएकोले खरेजी गर्नुपर्ने माग उनीहरूको छ ।

विधार्थी परिषद्का केन्द्रीय संयोजक विवेक कुशवाहाको नेतृत्वमा भएको विरोध प्रदर्शनमा सहभागीले राष्ट्रघाती बीआरआई सम्झौता सार्वजनिक गर, चिनियाँ विस्तारवाद बन्द गर, पोखरा विमानस्थलमा भएको भष्टाचार छानविन गर, रेलको बहानामा सैन्य विस्तार बन्द गर लगायतका नारा लगाएका थिए ।