अरुले हार्ने भन्ने होइन, मैले जित्नेमा ढुक्क छु : बालेन शाह

३० वैशाख, काठमाडौं । काठमाडौं महानगरपालिकाको मेयरका उम्मेदवार बालेन शाहले आफूले जित्नेमा ढुक्क रहेको बताएका छन् ।

गैरीगाउँस्थित केन्द्रमा मतदान गरेपछि सञ्चारकर्मीसँग कुरा गर्दै उनले आफूले पाउने मत अरु बढ्ने समेत दाबी गरे । उनले भने, ‘अरु कसैले हार्नेभन्दा पनि हामीले जित्ने हो, मेरो प्रतिस्पर्धा कसैसँग होइन । म नगरबासीको काम गर्न मेयरमा उठेको हुँ ।’

शाहले काठमाडौंको मेयर बनेर काम गर्नु आफ्ना लागि सजिलो काम भएको समेत बताए । आफू विजयी भएमा नगरवासीको दैनिकीलाई सहज बनाउने काममा नै केन्द्रित हुने बताए । ‘हामीले गर्ने काम सिस्टममा हुनेछ, कसैले दुःख पाउनु पर्दैन,’ उनले भने ।